Medidas de seguridade viaria e máis servizos para a infancia, principais propostas do Consello Parroquial de Rus
O Concello de Carballo pedirá á Deputación da Coruña a transferencia do tramo de vía que vai dende a estrada xeral ata a igrexa
Sábado 11 de febreiro do 2017
![](../media/img/rus_3_800x460.jpg)
O numeroso Consello Parroquial de Rus celebrou o venres pola noite a súa primeira xuntanza, na que por parte dos representantes veciñais trasladáronse ao Concello de Carballo as demandas, propostas e inquedanzas recollidas nunha asemblea veciñal previa. As máis importantes están relacionadas coa seguridade viaria, unha preocupación que comparten a cidadanía e os gobernantes, e que no caso de Rus céntranse na mellora da sinalización horizontal e vertical no cruce da Canosa e na construción de beirarrúas dende a estrada xeral ata a igrexa.
O alcalde de Carballo, que presidiu a reunión, coincidiu coa veciñanza na perigosidade de ámbolos tramos, que, casualmente, forman parte de vías da Deputación da Coruña. Evencio Ferrero comprometeuse a solicitar ao organismo provincial, por unha banda, a transferencia da pista que conduce á igrexa, o que permitiría ao Concello acometer pola súa conta a obra demandada polo Consello Parroquial. Así mesmo, pedirá que os enxeñeiros da Deputación visiten a zona da Canosa para concretar o tipo de sinalización precisa, tanto no que respecta ao pintado da vía (os veciños queren liña continua e pasos de peóns) coma aos indicadores de limitación de velocidade.
![](../media/img/0rus_2_800x460.jpg)
Ao igual que en Oza, en Rus tamén están preocupados polos danos causados polas empresas madeireiras, aínda que tamén defenderon esta actividade pola repercusión económica que ten, e recoñeceron que non é doado conciliar os intereses de todos.
No Consello Parroquial de Rus, no que estiveron representados os grupos municipais do BNG e Terra Galega, tamén se puxo sobre a mesa a necesidade de máis servizos para a infancia, en concreto un parque infantil en Calvos, que o alcalde condicionou á existencia dun número mínimo de nenos/as que garantan o seu uso; unhas porterías en Ramil, e unha marquesiña na Canosa, dúas peticións que tamén estudará o Concello de Carballo.
A próxima xuntanza do Consello Parroquial de Rus será o 15 de xuño.