.jpg)
Inicio Carballo ao día Hemeroteca
Venres 7 de xullo do 2006
O Concello de Carballo confirmou o inicio das obras do peche do CEIP San Luís Romero, dando así cumprimento a unha vella demanda da comunidade educativa. As obras consisten na sustitución do peche actual de alambrada por un peche de postes de formigón, das mesmas características que a fachada principal.
Venres 7 de xullo do 2006
Logo da primeira proxección de cine de verán, onte na praia de Razo, esta fin de semana comezan as actividades infantís e teatrais do Verán Cultural do Concello de Carballo, con dúas compañías de longa traxectoria. Este venres, 7 de xullo, a compañía de Títeres Cachirulo representa no Xardín Municipal, a partir das 20.00 horas, un espectáculo baseado no coñecido libro de Kipling O libro da Selva. Mañá sábado, 8 de xullo, e a partir das 22.30 horas, Mofa e Befa presentan na Praza do Concello o seu espectáculo Cultura para dar e tomar, unha actividade incluída no programa do I Simposio Internacional de Megalitismo que desde este venres acolle o Pazo da Cultura.
Venres 7 de xullo do 2006
O Concello de Carballo, dentro da campaña Carballo Limpo, iniciou 65 informes de infracción sobre a limpeza de solares. A medida é froito dun lento proceso que comezou coa aprobación da ordenanza de limpeza, e seguiu coa creación dun protocolo de actuación entre os servizos de Medio Ambiente, Policía Local, Oficina Técnica e oServizos Xurídicos do Concello. Neste momento estase procedendo a visitar estes 65 solares por parte dos servizos técnicos do Concello. Con posterioridade, entregaranlle un informe á Polícia Local e esta encargarase de comunicarlle ao propietario ou propietaria un prazo dun mes antes de abrirlle o expediente administrativo definitivo por parte dos servizos xurídicos.
Xoves 6 de xullo do 2006
Este xoves, 6 de xullo, comezan as Noites de Cine 2006, que o Concello de Carballo oferta durante os meses de xullo e agosto. En total haberá 28 proxeccións en distintas zonas do concello, para un total de 12 películas. As Noites de Cine ábrense esta noite na praia Razo, coa proxección de Embrujada, a partir das 22.30 horas. A mesma película poderá visionarse o 11, 17, 24, 27 e 31 de xullo, en Goiáns, Entrecruces, Ardaña, Baldaio e Berdillo, respectivamente.
Xoves 6 de xullo do 2006
O director xeral de Cultura, Luís Bará, ven de confirmarlle ao alcalde de Carballo, Evencio Ferrero, que as obras da 1.ª fase do Centro Social de Berdillo, por importe de 115.742,80 euros, vanse executar neste ano 2006. Ambas as partes asinarán un convenio neste mes de xullo e as obras deberán estar certificadas no mes de novembro.
Xoves 6 de xullo do 2006
O segundo trimestre do ano 2006 confirma a alza espectacular na tramitación de licenzas para a construción de vivendas en Carballo. No núcleo urbano xa se tramitaron licenzas para a construción de bloques de edificios para 306 vivendas. Nas zonas de núcleos rurais tamén aumentan as solicitudes de licenzas, cun total de 26 para vivendas unifamiliares. No primeiro semestre do ano estanse acadando cifras próximas ás totais do ano pasado, xa que a Oficina Técnica Municipal tramitou, en todo o ano 2005, licenzas para 441 vivendas en bloques de edificios no núcleo urbano e un total de 51 vivendas unifamiliares nas zonas de núcleos rurais. No que levamos de 2006, tramitáronse licenzas para 409 vivendas en bloques de edificios no núcleo urbano e 48 vivendas unifamiliares nas zonas de núcleos rurais.
Mércores 5 de xullo do 2006
Carballo será escenario esta fin de semana, entre o 7 e o 9 de xullo, do primeiro Simposio Internacional de Megalitismo. Baixo o título O patrimonio megalítico da Costa da Morte no seu contexto atlántico, unha decena de profesores/as, arqueólogos/as e técnicos/as doutras especialidades abordarán diferentes aspectos do mundo megalítico. O congreso está organizado polo Seminario de Estudos Comarcais e o programa está dispoñible na web da asociación.
Mércores 5 de xullo do 2006
O segundo trimestre do ano 2006 confirma a alza espectacular na tramitación de licenzas para a construción de vivendas en Carballo. No núcleo urbano xa se tramitaron licenzas para a construción de bloques de edificios para 306 vivendas. Nas zonas de núcleos rurais tamén aumentan as solicitudes de licenzas, cun total de 26 para vivendas unifamiliares. No primeiro semestre do ano estanse acadando cifras próximas ás totais do ano pasado, xa que a Oficina Técnica Municipal tramitou, en todo o ano 2005, licenzas para 441 vivendas en bloques de edificios no núcleo urbano e un total de 51 vivendas unifamiliares nas zonas de núcleos rurais. No que levamos de 2006, tramitáronse licenzas para 409 vivendas en bloques de edificios no núcleo urbano e 48 vivendas unifamiliares nas zonas de núcleos rurais.
Martes 4 de xullo do 2006
Este martes, 4 de xullo, comezan na piscina Vila de Noia os cursos intensivos de verán de natación, que o Padroado Deportivo Municipal ten programado para o mes de xullo. Os cursos son de iniciación para adultos e para nenos, tendo o primeiro turnos de mañán e de noite.
Martes 4 de xullo do 2006
Esta martes, 4 de xullo, comezan a funcionar os colectores soterrados da rúa Coruña. O pasado 8 de xuño asinouse a acta de recepción correspondente á obra, polo que o Concello pasa a asumir a explotación, mantemento e conservación da mesma. As obras contaron cun orzamento de 55.720 euros e prolongáronse por espazo de menos dun mes. Os colectores pódense ver xa instalados no comezo da rúa Coruña, á altura do Padroado Deportivo Municipal.
Martes 4 de xullo do 2006
O alcalde de Carballo, Evencio Ferrero, e a concelleira de Cultura, Belén Lendoiro, presentaron esta mañá o programa do Verán Cultural do Concello de Carballo, que se vai desenvolver durante os meses de xullo e agosto. A música, o teatro e a maxia son os protagonistas dun extenso e variado programa pensado para todas as idades, dividido en trece xornadas e sumando un total de 25 actuacións. As actividades desenvolveranse ao aire libre e durante a próxima fin de semana xa se poderá gozar coas actuacións de Títeres Cachirulo, o venres no Xardín Municipal, e Mofa e Befa, o sábado na Praza do Concello.
Luns 3 de xullo do 2006
A Concellaría de Cultura do Concello de Carballo vén de modificar, desde o pasado 1 de xullo, o horario dos equipamentos culturais do municipio, co fin de adaptalos ao horario de verán. As modificacións afectan á Ludoteca, Aula de informática, Pazo da Cultura, Museo Bergantiños e Biblioteca.