DEPORTE
Martes 19 de decembro do 2006
O Pavillón da Zona Escolar será escenario, o vindeiro 30 de decembro, do primeiro Maratón de Fútbol Sala feminino Concello de Carballo. O evento presentouse este martes na Casa do Concello, nun acto no que estiveron presentes o alcalde de Carballo, Evencio Ferrero, o xerente do Padroado Deportivo Municipal, Francisco García, e o coordinador das Escolas de Fútbol Luís Calvo Sanz, organizador do torneo, José Ramón Torres Pichel. O maratón contará coa presenza de nove equipos, ademais de tres partidos de exhibición nas categorías alevín, infantil e cadete.
CULTURA
Luns 18 de decembro do 2006
O Nadal Cultural do Concello de Carballo ofrece durante esta semana unha grande cantidade de actividades de ocio para disfrute dos veciños da localidade. Os nenos volverán a ser os grandes protagonistas das festas, con actos como a entrega de premios do Concurso de Postal e Cartel de Nadal, o mércores as 11,30 horas na Casa do Concello, a visita de Papá Noel ás Escolas Unitarias o mércores e xoves, ou o obradoiro Carta para os Reis Magos que acollerá a Ludoteca Municipal o venres 22, de 18,00 a 19,30 horas. Esta última actividade terá continuidade os días 26 e 28 de decembro e 4 de xaneiro.
CONVOCATORIA
Luns 18 de decembro do 2006
A Casa do Concello de Carballo alberga este luns, 18 de decembro, unha nova xuntanza da Comisión Especial de Seguridade Cidadá, a partir das 19,00 horas. Ademáis da aprobación da acta da sesión anterior e o turno de rogos e preguntas, a orde do día contempla un único punto referente á seguridade cidadá na campaña de Nadal. A esta nova xuntanza están invitados os comerciantes do concello de Carballo.
SERVIZOS E MANTEMENTO
Venres 15 de decembro do 2006
A Brigada de Medio Ambiente de Carballo comezará a vindeira semana, se as condicións meteorolóxicas o permiten, os traballos de mellora do acceso á Férveda de Rus, a segunda maior do concello logo da de Entrecruces. As labouras, segundo informou a Concellaría de Servizos e Mantemento, consistirán nunha capa de zahorra ao longo dos máis de 150 metros da pista que chega ao lugar.
CULTURA
Venres 15 de decembro do 2006
O Pazo da Cultura será o referente esta fin de semana do programa do Nadal Cultural do Concello de Carballo, ao acoller tres actuacións musicais o venres, sábado e domigo. Para hoxe venres, 15 de decembro, está programada a actuación do Consorcio Vocal de Santiago con Cantos para a Natividade. A actuación, que organiza o Concello e na que colabora a Deputación da Coruña, comezará ás 21,00 horas e a entrada é libre. O Consorcio Vocal de Santiago é un pequeno grupo vocal de voces mixtas, formado en 2002 por músicos galegos, que ofrecen concertos desenfadados e próximos ao público. Na súa actuación interpretarán 17 obras, todas relacionadas coas festas de Nadal.
MEDIO AMBIENTE
Xoves 14 de decembro do 2006
A Brigada de Medio Ambiente do Concello de Carballo procede estes días á limpeza de fontes, lavadoiros e áreas recreativas próximas a éstes da localidade. Os operarios municipais están a desbrozar e cortar o céspede, ademáis de baldear as fontes e lavadoiros que o necesitan e proceder á súa limpeza manual e coa utilización de cepillo.
CULTURA
Xoves 14 de decembro do 2006
O Concello de Carballo ven de presentar unha nova edición do Nadal Cultural, un extenso programa que se desenvolverá durante un mes e no que a música, o cine, maxia, danza e teatro coparán boa parte das actuacións. Os actos comezarán este venres, día 15 de decembro e rematarán co Concerto de Nadal o 7 de xaneiro. Un mes para disfrutar dun programa no que na súa concepción tívose moi en conta aos verdadeiros protagonistas do Nadal, os nenos. A programación para esta fin de semana complétase co Festival de Panxoliñas o sábado e o concerto de Il Vecchio Borgo o domingo, ambas actividades a desenvolver no Pazo da Cultura.
TRÁFICO
Mércores 13 de decembro do 2006
Os recentemente abertos tramos da avenida de Bergantiños e rúa Pontevedra permanecerán pechados ao tráfico até que o tempo permita facer o traballo de aglomerado para facilitar a circulación de vehículos. A choiva dos últimos días afectou considerablemente a estes dous enclaves, xerando algún desperfecto que impide o normal tránsito dos coches.
SERVIZOS SOCIAIS
Mércores 13 de decembro do 2006
A delegada provincial da Vicepresidencia da Igualdade e do Benestar, Tereixa Novo, anunciou onte a inversión de 168.000 euros que a Xunta de Galicia realizará o vindeiro ano na Residencia de Maiores da Praza de Vigo. Fíxoo a delegada provincial na visita que fixo ás instalacións, acompañada polo alcalde de Carballo, Evencio Ferrero, e o novo director, Alfonso Novoa. Tereixa Novo anunciou, igualmente, que apoiará a solicitude de ampliación das instalacións formulada desde o Concello. Éste traballa na negociación dunha permuta que permita dispoñer dunha parcela de tres solares, de máis de 300 metros cadrados, situados nun dos laterais da Residencia.
URBANISMO
Mércores 13 de decembro do 2006
A mesa de contratación acordou, por unanimidade de todos os seus membros, propor ao Pleno que declare deserto o concurso de contratación da construción e explotación do aparcadoiro e do edificio comercial da Praza do Concello. A mesa de contratación reuniuse este mércores, 13 de decembro, e adoptou a decisión por unanimidade logo de comprobar os informes que descartaban a viabilidade da oferta presentada pola UTE Benal-Aldesa.
XUNTA DE GOBERNO LOCAL
Luns 11 de decembro do 2006
A Xunta de Goberno Local procedeu á concesión, na xuntanza celebrada este luns, de dúas licenzas de obra para outros tantos edificios en Carballo. A suma total das vivendas que albergarán os dous edificios é de 20. Trátase dun edificio na rúa Gran Vía, de 6 vivendas, e outro na rúa Vicente Risco, esquina con Pascual Veiga, de 14 vivendas. Ademáis, aprobouse a licenza para a construcción dunha vivenda unifamiliar no lugar das Travesas, na parroquia de Sísamo.
SERVIZOS SOCIAIS
Luns 11 de decembro do 2006
A Vicepresidencia da Igualdade e do Benestar, a través da Secretaría Xeral do Benestar e a Dirección Xeral de Acción Social, van de abrir o prazo de presentación de solicitudes para os maiores do concello que queran participar no Programa de Termalismo Social do Imserso, para as quendas dos meses de febreiro a agosto e de setembro a decembro de 2007. Os que non dispoñan das mesmas, xa remitidas polo Imserso ao domicilio dos solicitantes do ano pasado, poden recollelas nos Servizos Sociais do Concello de Carballo. Tamén poden descargarse os modelos na páxina do Programa de Termalismo Social, onde pode ampliarse a información desta iniciativa.
.jpg)