'CARBALLO EMPRENDE 2008'
Venres 16 de maio do 2008
Calquera persoa que teña unha idea emprendedora, sexa propietaria dun negocio de recente creación, esté a desenvolver unha iniciativa formativa relacionada co autoemprego ou estudantes de ciclos formativos poden concorrer aos 'Premios Carballo Emprende 2008', que convoca o Concello de Carballo con motivo da celebración das xornadas 'Carballo Emprende 2008' os días 22 e 23 de maio. O prazo para a presentación de traballos remata o 19 de maio, inclusive. Esta tamén é a data límite para participar no I Premio de Programas de Fomento da Emprendeduría. Para máis información sobre estas convocatorias e para consultar as bases, clicar aquí.
CONSELLERÍA DE MEDIO AMBIENTE
Xoves 15 de maio do 2008
O titular de Medio Ambiente da Xunta de Galicia, Manuel Vázquez, anunciou hoxe -día 15 de maio- en Carballo que a súa Consellería investirá 8,5 millóns de euros no municipio bergantiñán nos vindeiros meses nun total de cinco proxectos. O representante do Goberno galego visitou o Concello acompañado polo Delegado provincial de Medio Ambiente na Coruña, Manuel Tajes, e polo Director Xeral de Augas de Galicia, José Luis Romero.
NO LUGAR DE XOANE DA ESTRADA
Mércores 14 de maio do 2008
O Concello de Carballo recibiu recentemente unha comunicación da Consellería de Innovación e Industria confirmando que Unión Fenosa executará as obras para solucionar os problemas de subministro eléctrico no lugar de Xoane da Estrada, na parroquia de Goiáns, durante o presente ano 2008. Esta contestación positiva chega despois de que o Goberno Local trasladara á Xunta e a Unión Fenosa durante os últimos dous anos varios escritos (o primeiro foi remitido en xaneiro do 2006) nos que se deixaba constancia das reclamacións veciñais para acadar este servizo básico.
KIKO NOVOA OBTIVO O SEGUNDO PREMIO
Martes 13 de maio do 2008
O xurado do 'IV Premio a artigos xornalísticos normalizadores Concello de Carballo', despois de examinar detidamente os 40 traballos que se presentaron ao certame, fallou os dous premios que establecía o concurso. O primeiro, dotado con 1.000 euros e a publicación do artigo nas nove publicacións que colaboran no certame ('A Nosa Terra', 'A Peneira', 'Diario de Bergantiños', 'Galicia Hoxe', 'La Opinión de A Coruña', 'La Voz de Galicia', 'O Acontecer', 'Tempos Novos' e 'Vieiros'), recaeu no artigo titulado 'A bendita intranscendencia do pop', de Xesús Fraga Sánchez.
TERCEIRA IDADE
Luns 12 de maio do 2008
A Concellería de Terceira Idade do Concello de Carballo -responsabilidade de Lourdes Rey- organiza en colaboración coa Vicepresidencia da Xunta de Galicia o 'III Encontro Nacional Lecer para os Nosos Maiores', que ao igual que o ano pasado se celebrará na localidade ourensana do Carballiño. Este ano, a xornada terá lugar o 14 de xuño e o prazo para apuntarse na mesma manterase aberto ata o día 26 de maio.
TAMÉN ESTÁ A LIMPAR AS PRAIAS
Venres 9 de maio do 2008
A Brigada de Medio Ambiente do Concello de Carballo procedeu durante esta semana á erradicación de cinco puntos nos que se viñan realizando verteduras incontroladas de lixo. Estes vertedoiros estaban localizados no Forno (Artes), en Figueiroa e na Cepeira (Sísamo), na Revolta (Carballo) e en Buriz.
A CÁMARA DE COMERCIO DA CORUÑA COLABORA NESTA INICIATIVA
Venres 9 de maio do 2008
O Concellería de Promoción Económica do Concello de Carballo -responsabilidade do nacionalista Xosé Manuel García Guillín- volve apostar forte a prol da dinamización económica da Costa da Morte coa celebración dunhas xornadas dirixidas ás persoas emprendedoras. 'Carballo Emprende 2008' concíbese coma un punto de encontro para empresarios emerxentes, persoas con inquedanzas polo autoemprego, o cooperativismo ou outras oportunidades de negocio na comarca. A Cámara de Comercio da Coruña colabora na organización deste evento, que se desenvolverá no Viveiro de Empresas do Polígono de Bértoa durante os días 22 e 23 de maio.
OS DÍAS 17 E 18 DE MAIO NO PAVILLÓN BERGANTIÑOS
Xoves 8 de maio do 2008
O pavillón Bergantiños de Carballo acollerá os días 17 e 18 de maio o II Torneo Escola Lubiáns de Hóckey a Patíns, que este ano servirá ademais para conmemorar o 25 aniversario da fundación do club organizador. O evento reunirá a preto de 160 menores con idades comprendidas entre os 4 e os 11 anos e a un total de 16 equipos. Será, polo tanto, unha auténtica festa do deporte de base, faceta que durante a presente temporada a Escola Lubiáns pretendeu fomentar federando un equipo prebenxamín, outro benxamín e tamén unha escola de iniciación.
'DESFRUTA DO DEPORTE CO TEU BEBÉ'
Mércores 7 de maio do 2008
A Concellería de Igualdade de Concello de Carballo, a través do Centro de Información á Muller (CIM) e en colaboración coa Concellería de Deportes, abre o prazo de inscrición para a quenda de tarde do obradoiro 'Desfruta do deporte co teu bebe' ante o éxito acadado pola quenda de mañán, que xa principiou o martes. Este taller está concebido para que participen no mesmo bebés de entre un e tres anos, que estarán en todo momento acompañados durante esta actividade por algún dos seus proxenitores. O prazo de inscricipión para a segunda vez desta actividade manterase aberto ata o 16 de maio, día no que principiará o taller.
PROMOCIÓN DA LINGUA, DO LIBRO E DA LECTURA
Venres 2 de maio do 2008
A Concellería de Cultura e Normalización Lingüística de Carballo, responsabilidade de Belén Lendoiro, presentou hoxe -día 2 de maio- o Programa das Letras. Esta iniciativa aglutina a programación cultural que ofrecerá o Concello durante o presente mes de maio e que se desenvolverá principalmente arredor de tres eixos: promoción da lingua galega, do libro e da lectura. O Programa das Letras tamén integra actividades organizadas por diferentes asociacións culturais do municipio bergantiñán.
REDE DE DINAMIZACIÓN DA SOCIEDADE DA INFORMACIÓN
Mércores 30 de abril do 2008
O Concello de Carballo, en colaboración coa Rede de Dinamización da Sociedade da Información, abriu o prazo para inscribirse en dous obradoiros que se van desenvolver no mes de maio con motivo da celebración do Día das Letras Galegas, do Día de Internet e do Día Mundial das Telecomunicacións e da Sociedade da Información. O obxectivo primordial destas actividades será fomentar iniciativas que promovan o emprego do galego e das tecnoloxías da información por parte da poboación que aínda non está moi habituada no manexo de internet.
PODERASE VISITAR ENTRE OS DÍAS 2 E 15 DE MAIO
Martes 29 de abril do 2008
A exposición 'Podemos. Queremos. Corresponsabilidade: responsabilidades compartidas' poderá ser visitada entre o 2 e o 15 de maio na Casa do Concello. Esta mostra está organizada pola Concellería de Igualdade de Carballo -responsabilidade da nacionalista Lourdes Rey- e promovida pola Vicepresidencia da Xunta. A mesma consta de 11 fotografías que amosan a outras tantas personaxes públicas galegas do sexo masculino realizando tarefas no fogar.
.jpg)