UNHA DELEGACIÓN DO CONCELLO DE ARES VISITOU O CENTRO DE FORMACIÓN
Xoves 5 de marzo do 2009
Os 40 alumnos e alumnas da Escola Obradoiro do Concello de Carballo -que conta con 5 especialidades, remata en decembro de 2009 e nestes momentos desenvolve o seu período de prácticas- veñen de principiar esta semana os traballos que permitirán a creación dun parque e unha zona verde no entorno do CEIP Bergantiños da capital municipal. Este espazo contará cunha zona de ocio para maiores así como cun parque infantil. Parte do mobiliario urbano será elaborado polos propios integrantes desta Escola Obradoiro, que nestes momentos están a piques de rematar as melloras da zona verde situada na praza dos Xulgados. Os alumnos e alumnas tamén traballan no acondicionamento dos postos exteriores do mercado e na Casa dos Oficios.
XESTUR COMPROMÉTESE A FACILITAR A COMPRA DOS TERREOS
Xoves 5 de marzo do 2009
Xestur mantén aberto o proceso para a adxudicación de parcelas da primeira fase de ampliación -de 718.482 metros cadrados- do parque empresarial carballés de Bértoa. Os terreos, propiedade de Xestur Coruña SA, están divididos en 147 parcelas con superficies que van dende os 600 metros cadrados ata os 32.000 metros. O uso destas parcelas será industrial de primeira, industrial ou terciario, sendo a maioría para uso industrial e o seu tamaño medio de entre 2.000 e 4.000 metros cadrados. Os interesados en presentar as solicitudes poden facelo nas oficinas de Xestur Coruña na Ronda de Nelle da capital provincial.
XUNTA DE GOBERNO LOCAL
Martes 3 de marzo do 2009
A Xunta de Goberno Local vén de aprobar o luns 2 de marzo a adxudicación definitiva da segunda fase da 'Rede de saneamento en Paradela e depuradora na parroquia de Sofán' e a segunda fase da 'Rede de saneamento en Cances da Vila, parroquia de Cances' por 73.080 e 46.168 euros respectivamente. En total, trátase dun investimento que se achega aos 120.000 euros e que está incluído no Plan de Cooperación adicional da Deputación da Coruña. En ámbolos dous casos, o prazo de execución dos traballos é de seis meses. Nos dous proxectos, as obras serán realizadas por Construcciones Ramón Vázquez y Reino.
SESIÓN PLENARIA
Martes 3 de marzo do 2009
A corporación carballesa aprobou por unanimidade na sesión plenaria celebrada o luns 2 de marzo unha moción na que se demanda apoio aos empresarios de Carballo para a adquisición de parcelas no polígono industrial de Bértoa. A corporación solicita información para determinar o prezo final dos terreos e insta á Xunta de Galicia a que adopte as medidas necesarias para que os emprendedores poidan acceder a solo industrial en Carballo e a Costa da Morte a prezos competitivos. Por último, a moción tamén subliña a necesidade de que se ofrezan facilidades de pago para os empresarios que queiran implantar os seus proxectos no parque de Bértoa.
MEDIO AMBIENTE
Luns 2 de marzo do 2009
O xoves 5 de marzo celébrase o Día Mundial da Eficiencia Enerxética. O Concello de Carballo, a través da Concellaría de Medio Ambiente que dirixe Xosé Antonio Viña, únese a esta iniciativa co ánimo de divulgar as boas prácticas enerxéticas entre a cidadanía e coa idea de convidar a facer unha reflexión sobre o uso que se lle dá á enerxía nas facianas máis cotiás da vida diaria. O obxectivo e fomentar o uso intelixente da enerxía, reducindo o consumo, aforrando cartos e colaborando coa conservación do medio ambiente.
TRES TRAMOS DE ESTRADAS AUTONÓMICAS PASAN A SER DE TITULARIDADE MUNICIPAL
Sábado 28 de febreiro do 2009
O Concello de Carballo amplía o contrato de xestión de limpeza viaria que vén realizando o Centro Especial de Emprego Aspaber UTE para achegar o servizo a novos polígonos do casco urbano, así como a 19 núcleos rurais. No caso da capital municipal, a limpeza ampliarase a zonas recentemente urbanizadas -como por exemplo o entorno da avenida de Razo-, mentres que no caso do rural o acordo recolle a realización da limpeza tres veces ao ano. O contrato increméntase nunha cantidade anual de 51.114 euros -para chegar aos 292.864 euros- e supón, en verbas do Alcalde, Evencio Ferrero, "unha aposta importante por Aspaber, que merece o apoio do Concello".
A CITA É O VENRES 27 ÁS 21.00 HORAS
Venres 27 de febreiro do 2009
Despois da programación de Antroido, o venres 27 de febreiro continúa a programación dos Venres Culturais co espectáculo teatral 'Náufragos' a cargo da compañía galega Teatro Galileo. Un matrimonio de clase alta e un amigo común son vítimas dun naufraxio nunha illa deserta, onde deben facer fronte a un novo xeito de vida. Naquel espazo hostil para os tres personaxes, comezan a establecerse novos xeitos de relacións sentimentais, sobre todo, cando aparece unha cuarta persoa que complica as cousas. A cita é ás 21.00 horas no Pazo da Cultura.
CULTURA
Mércores 25 de febreiro do 2009
O Concello de Carballo e a Escola Oficial de Idiomas invitan a todos aqueles que coñezan a lingua francesa a asistir á representación da asociación L’Herbe d’Or que terá lugar o luns 2 de marzo ás 20.00 horas no auditorio do Pazo da Cultura. O espectáculo, titulado 'Gros comme ça', é unha mestura de teatro, contacontos e cancións. O tema da obra é o amor, historias de amor contadas e cantadas con moito humor, que ao fin e ao cabo son iguais dos dous lados dos Pirineos. O espectáculo será en francés pero tamén estará salpicado dalgunha breve tradución para facilitar a comprensión da obra a todos os asistentes.
CULTURA
Martes 24 de febreiro do 2009
Coa finalidade de dinamizar as festas do Antroido, fomentando a participación de tódolos veciños e veciñas nunha actividade vencellada a esta celebración, o Concello de Carballo organiza o Enterro da Sardiña para pechar o Don Carnal de 2009. O martes 24 a partires das 21.30 horas unha comitiva fúnebre sae dende a Praza do Concello para realizar un percorrido que transcorre polas rúas Coruña e Hórreo, a praza de Galicia, a rúa Fomento e que chega ata o parque do Anllóns, lugar onde se celebrará o enterro. Para animar a actividade está prevista a colaboración do grupo de teatro Vagalume.
IGUALDADE E BENESTAR
Luns 23 de febreiro do 2009
O Concello de Carballo e a asociación Mulleralia -entidade sen ánimo de lucro destinada á integración social e laboral das mulleres con desvantaxe social- veñen de poñer en marcha o Banco de Tempo municipal, unha iniciativa que persegue a conciliación da vida laboral e familiar dos veciños e veciñas a través do intercambio de servizos comunitarios entre os seus usuarios. A Concellaría de Igualdade será a encargada de supervisar esta actividade, na que pode participar calquera persoa maior de idade. As oficinas do Banco de Tempo están situadas no primeiro andar do edificio do antigo ambulatorio e están abertas de 9.30 a 13.30 horas.
CULTURA
Venres 20 de febreiro do 2009
O venres 20 de febreiro principia o programa de Antroido do Concello de Carballo cun programa dirixido a tódalas idades e que inclúe obradoiros, bailes, actuacións e o xa tradicional Concurso de disfraces, comparsas e carrozas, co peche o martes 24 no Enterro da Sardiña. Pero antes, o broche de inicio do Antroido pono o venres a compañía Troula Animación a partir das 00.00 horas coa representación do espectáculo 'Lume' (na imaxe) na Praza do Concello e na Rúa da Estrela. Diabólicos trasnos, diaños, meigas e mortos vivintes saen á rúa para desfrutar da noite, queimando e mandando ao inferno o peor dos pesadelos entre lumes e fogos.
PROMOCIÓN ECONÓMICA
Venres 20 de febreiro do 2009
O Concello de Carballo e o Centro Comercial Aberto (CCA) participan conxuntamente na organización dunha Feira de Oportunidades coincidindo co Feirón de Primavera, que se desenvolverá os días 28 e 29 de marzo. Unha gran carpa, instalada no San Martiño albergará os stands montados para que os comerciantes dos distintos sectores expoñan e liquiden os excedentes da campaña de inverno, e mesmo artigos de primavera a prezos atractivos para o cliente. Como nos anteriores feiróns, na Praza do Concello instalarase a carpa de Merca-do bo, dedicada á promoción dos produtos da zona.
.jpg)