CONCELLARÍA DE CULTURA
Xoves 16 de abril do 2009
Conseguir que a danza sexa algo atractivo para tódolos públicos e facer que esta arte sexa accesible, "non algo minoritario e exclusivo, senón que se achegue ao público en xeral", en verbas da Concelleira de Cultura, Belén Lendoiro, é un dos principais obxectivos do programa Primavera EnDanza, que desenvolve a súa andaina entre o 23 de abril e o 3 de maio. Nesta a súa sétima edición, tres compañías galegas, unha madrileña e unha catalana centran un variado programa de espectáculos que conta con multitude de actividades paralelas -charlas, obradoiros ou encontros cos espectadores- destinadas a que o público desfrute da danza e aprenda a entendela mellor.
CONCELLARÍA DE CULTURA
Mércores 15 de abril do 2009
O alcalde de Carballo, Evencio Ferrero, e o reitor da Universidade da Coruña, José María Barja, veñen de asinar hoxe un convenio de colaboración entre as dúas entidades que representan para a realización en Carballo no mes de xullo do V Curso de Verán sobre Dinamización Lingüística, que terá lugar no Pazo da Cultura de Carballo os días 15, 16 e 17 de xullo de 2009. Esta edición, que se desenvolve en Carballo por segundo ano consecutivo, centrarase no argumentario e na análise do compromiso individual coa lingua galega, e nel participarán diversos expertos en normalización lingüística de Galiza e doutras partes do estado.
OUTORGARASE UN PREMIO DE 1.200 EUROS E A PUBLICACIÓN DO ARTIGO GAÑADOR
Mércores 15 de abril do 2009
O Concello de Carballo, desde o seu Servizo de Normalización Lingüística e en colaboración con dez medios de comunicación escrita, convoca por quinto ano consecutivo o Premio a artigos xornalísticos normalizadores, un certame que ten como obxectivos promover a reflexión sobre a situación social da lingua galega, crear espazos nos xornais para analizar e promocionar o uso do idioma galego e promover o uso do galego na prensa escrita. Ao certame pódense presentar artigos xornalísticos inéditos de opinión que traten algún tema concreto relacionado coa defensa e promoción da lingua galega ou con experiencias útiles ou favorábeis para a dinamización da lingua, coa política lingüística, etc.
XUNTA DE GOBERNO LOCAL
Martes 14 de abril do 2009
A Xunta de Goberno Local vén de aprobar esta semana un Convenio de colaboración co Consorcio Galego de Servizos da Igualdade e do Benestar para a xestión do Centro de día de Carballo, que nestes momentos se está construíndo na praza de Vigo da capital municipal, xunto á actual residencia para a terceira idade. Segundo este acordo -que ten unha vixencia de dez anos- é o Consorcio o que asume o control do servizo, desempeñando labores como a contratación do persoal, a elaboración dun proxecto de atención xerontolóxica e tódalas xestións que se deriven da cesión de uso do Centro, ademais dos gastos derivados do seu funcionamento e do seu equipamento unha vez rematadas as obras construtivas.
OBRAS
Luns 13 de abril do 2009
O Concello de Carballo vén de rematar hai uns días as obras de mellora na estrada AC-400 (que une Cerceda e Santa Comba), á altura do Outón, na parroquia de Rus. Esta actuación consiste na creación dunha senda peonil nas dúas marxes da vía, nunha lonxitude de preto dun quilómetro. A administración local asume a realización deste proxecto, que pretende mellorar a seguridade viaria creando un espazo para os peóns nunha estrada con grande intensidade de circulación, como é a AC-400, no tramo que transcorre polo Concello carballés. Esta actuación vén a completar o proxecto realizado pola Consellería de Política Territorial para mellorar esta vía, unha actuación que contou cun orzamento superior aos dous millóns de euros.
XUNTA DE GOBERNO LOCAL
Luns 13 de abril do 2009
O Concello vén de sacar adiante, na sesión ordinaria da Xunta de Goberno Local do 13 de abril, o expediente de contratación para a 'Redacción do proxecto básico e de execución da obra de remodelación do mercado municipal de Carballo". Ábrese así o proceso de licitación desta actuación, que ten un orzamento previsto de 95.000 euros e que segue un sistema de adxudicación de negociado con publicidade. Desta forma principian os trámites para emprender unha reforma integral do edificio, do que só está previsto conservar a estrutura. O obxectivo da administración local é que os traballos principien ao longo deste ano 2009.
III EDICIÓN DA FEIRA DA SOLIDARIDADE E A DIVERSIDADE
Mércores 8 de abril do 2009
A Praza do Concello, o Parque do San Martiño e a Casa da Xuventude acollen do 6 ao 17 de abril a terceira edición da feira da solidariedade e a diversidade de Carballo, o festival Panxea. A música, os obradoiros para os máis cativos e cativas, un ciclo de cine árabe ou unha chocolatada popular son algunhas das actividades, a maioría delas concentradas en torno ao xoves 9 e o venres 10 de abril, coincidindo co xoves e o venres santo. Panxea nace como unha iniciativa que pretende converterse nunha feira en torno á multiculturalidade, conmemorando o Día contra a discriminación racial e ofrecendo un programa completo de actividades para tódalas idades. Panxea abre unha fiestra solidaria tanto aos carballeses como aos visitantes da vila.
CONCELLARÍA DE DEPORTE
Mércores 8 de abril do 2009
A Deputación da Coruña vén de aprobar o proxecto para a instalación de alumeado no novo campo de fútbol do complexo das Eiroas. Esta actuación está incluída da Terceira Fase do Plan Especial de Iluminación nos Campos de Fútbol Municipais de herba artificial e ten un orzamento de 95.589 euros. Desta cantidade, o Concello aporta 35.589 euros, mentres que o organismo provincial contribúe ao financiamento dos traballos cos 60.000 euros restantes. Nestes momentos, o novo campo de fútbol anexo das Eiroas está en pleno proceso de remodelación, coa creación dun novo módulo de vestiarios e a dotación dun manto de céspede artificial.
ABERTO O PRAZO ATA O 15 DE ABRIL
Martes 7 de abril do 2009
A organización da III Carreira Pedestre da Costa da Morte, que se celebrará en Carballo o vindeiro día 19 deste mes, está a facilitar a tramitación da inscrición, que poderá facerse ata o vindeiro día 15. Neste senso, os corredores adultos poderán anotarse directamente a través da Internet, nas páxinas web de El Correo Gallego, co-organizador da cita xunto coa Concellaría de Deporte do Concello de Carballo, e tamén na páxina web ChampionChip. Nesta edición serán repartidos máis de 4.000 euros, cincuenta trofeos e dez lotes de agasallos. Ademais, este ano creouse o premio ao mellor colexio, que estará dotado dun lote de material deportivo. Os mellores clasificados de Costa da Morte e Carballo serán tamén agasallados.
OBRAS E SERVIZOS
Venres 3 de abril do 2009
O Concello de Carballo pon en marcha un plan de actuacións nos parques infantís municipais ao longo de 2009 para avanzar no acondicionamento de espazos de uso público, situados tanto na capital municipal como nas parroquias. Está previsto realizar un investimento de arredor de 900.000 euros, dos cales preto de 500.000 servirán para acondicionar o parque de Rego da Balsa, incluíndo tamén a instalación de xogos infantís. Así mesmo, realizaranse melloras na praza dos Xulgados, no parque Eduardo Pondal (na zona Bergantiños), no Parque do Hospital (no polígono urbano 29), no parque do Anllóns e na Praza do Concello. No caso das parroquias actuarase en Vivente, San Paio, A Brea e Vilela.
O VENRES 3 E O DOMINGO 5 DE ABRIL
Venres 3 de abril do 2009
Esta fin de semana o programa dos Venres Culturais entra na súa recta final con dúas propostas moi diferentes. Por unha banda, a canción de autor de Xabier Díaz, e pola outra a 'Bolboreta' de Títeres Trompicallo, para os máis cativos. Xabier Díaz presenta o seu traballo 'Coplas para Icia', o venres 3 de abril a partires das 21.00 horas no Pazo da Cultura. Dende Santiago, os monicreques entreterán aos máis pequenos cun conto no que os protagonistas son un monstro, un rei e unha nena que viven moitas aventuras. Neste caso, a cita é o domingo 5 de abril a partires das 18.00 horas, tamén no auditorio do Pazo da Cultura.
MEDIO AMBIENTE
Xoves 2 de abril do 2009
A Concellaría de Medio Ambiente que dirixe Xosé Antonio Viña solicita aos veciños e veciñas que cumpran coa normativa da Ordenanza municipal que regula a protección e tenencia de animais e non permitan que os seus cans anden ceibes polos espazos públicos, especialmente polo Paseo do Anllóns. Así, segundo a norma, "os animais deberán circular suxeitos con correa ou cadea". As infraccións poden supoñer sancións económicas que van dende os 150 aos 300 euros, así que para lembrar o cumprimento da ordenanza, operarios de Aspaber veñen de colocar ao longo do Paseo do Anllóns carteis que prohiben que os cans anden soltos.
.jpg)