NOVAS TECNOLOXÍAS: RDSI
Venres 31 de xullo do 2009
A Rede de Dinamización da Sociedade da Información (que ten a súa sede en Carballo no Telecentro do Pazo da Cultura) impartiu durante o mes de xullo un total de 4 obradoiros tecnolóxicos, a través dos que se formou a 45 persoas e que se estenderon ao longo de 33 horas. Os obradoiros impartidos este mes foron 'Correo electrónico' e 'Procesador de textos: Writer'. Cabe tamén destacar outros levados a cabo como 'Aprende xogando' e 'Facebook', que poñen de manifesto a grande diversidade formativa que oferta a Rede. Asemade, 23 persoas inscribíronse como novos usuarios e usuarias da Rede para poder aproveitar -sempre de xeito gratuíto- as instalacións e todas as iniciativas que esta oferta nas horas de aula aberta, que foi utilizada nun total de 447 ocasións.
VERÁN CULTURAL: VENRES 31 DE XULLO
Venres 31 de xullo do 2009
O programa do Verán Cultural 2009 prosegue en Carballo o venres 31 de xullo co espectáculo 'A maxia da Santa Compaña' a cargo do Mago Teto, onde a maxia máis sorprendente mestúrase coa cultura e coa tradición galega. Nun encontro coa Santa Compaña na Costa da Morte, esta entrégalle ao mago parte dos seus poderes e o Libro da Sabedoría cheo de maxia e conxuros. Música en vivo, teatro, danza, zancudos, adiviñacións, escapismos e demais fenómenos extraordinarios concéntranse nesta orixinal aposta, que conta coa colaboración da Deputación da Coruña e que principia ás 22.30 horas na Praza do Concello.
MÉRCORES 5 DE AGOSTO NO PAZO DA CULTURA
Venres 31 de xullo do 2009
O Concello de Carballo vén de presentar a 'I Xornada Galega do Deporte e Turismo Sen Barreiras' que se celebrará o vindeiro mércores 5 de agosto. Trátase dunha aposta do goberno local pola accesibilidade fomentando "que todo o mundo teña unha oportunidade para facer o deporte que lle gusta en igualdade de condicións" e ofrecer "igualdade de oportunidades para facer máis proveitoso o tempo de lecer", segundo subliñaron o Alcalde de Carballo, Evencio Ferrero, e o Concelleiro de Deporte, Marcos Trigo, durante a presentación da cita. A 'I Xornada Galega do Deporte e Turismo Sen Barreiras' terá lugar no Pazo da Cultura de Carballo entre as 10.00 e as 13.30 horas e contará coa presenza de representantes de varias asociacións de deporte adaptado e de deportistas de diversas especialidades.
CONCELLARÍA DE DEPORTE
Xoves 30 de xullo do 2009
O Alcalde de Carballo, Evencio Ferrero, e o Concelleiro de Deporte, Marcos Trigo, veñen de recibir no salón de plenos da Casa do Concello aos 30 integrantes do equipo do club Salvamento y Socorrismo Carballo (Sysca) que se proclamou campión galego en categorías infantil, alevín e cadete na competición celebrada en Marín. Ferrero felicitou aos nenos e nenas que participaron no campionato pola súa boa tempada e trasladoulles as felicitacións de todos os carballeses e carballesas pola súa actuación. Tamén recibiron un agasallo conmemorativo e foron felicitados persoalmente tanto por Trigo como por Ferrero
OS CARBALLESES E CARBALLESAS REALIZARON 1.162 DOAZÓNS EN 2008
Mércores 29 de xullo do 2009
O Concello de Carballo, Protección Civil e o Centro de Transfusión de Galicia (CTG), impulsan unha iniciativa que ten como obxectivo promover a participación dos veciños e veciñas nas campañas de doazón de sangue e, deste xeito, garantir o axeitado desenvolvemento do labor asistencial nos centros sanitarios galegos, que precisarán ao redor de 44.000 doazóns de sangue nos meses de verán para cubrir todas as necesidades dos pacientes, especialmente polo incremento no número de accidentes. As persoas que desexen participar poden acudir á unidade móbil do CTG que estará situada na Praza do Concello de Carballo o luns 3 e o martes 4 de agosto en horario de 10.00 a 14.00 e de 16.00 a 21.00 horas.
CONCELLARÍA DE CULTURA E NORMALIZACIÓN LINGÜÍSTICA
Martes 28 de xullo do 2009
O V Curso de verán 'Traballando en lingua, do compromiso individual aos argumentos', organizado polo Servizo de Normalización Lingüística da Universidade da Coruña en colaboración coa Coordinadora de Traballadores/as de Normalización da Lingua (CTNL) e o Concello de Carballo, que tivo lugar entre o 15 e o 17 de xullo vén de facer públicas as súas conclusións. Entre elas, hai que subliñar que 'cómpre dotar os discursos sobre a lingua de novos argumentos, imaxinativos, modernos, claros, rigorosos, integradores, coherentes, firmes e conciliadores' e que 'é preciso elaborarmos un abano de argumentarios dirixidos aos diversos grupos sociolingüísticos existentes na complexa realidade galega'.
SESIÓN PLENARIA ORDINARIA DO MES DE XULLO
Martes 28 de xullo do 2009
A corporación carballesa vén de sacar adiante por maioría dos seus membros a aprobación definitiva da Relación de Postos de Traballo (RPT) do Concello. Este documento inclúe unha relación da estrutura organizativa de tódolos postos de traballo municipais -nestes momentos uns 200- e valora cada posto de traballo e qué obrigas lle corresponden a cada empregado. Despois dun longo proceso iniciado no anterior mandato, agora o documento, que conta co apoio de todas as organizacións sindicais, pasa o seu visto e prace definitivo, despois de terse resolto un total de 21 alegacións presentadas por 18 persoas. A aprobación tivo lugar na sesión plenaria ordinaria do mes de xullo celebrada o luns 27, na que tamén saíu adiante o acordo económico para a implantación da RPT.
CONCELLARÍAS DE EDUCACIÓN, BENESTAR E DEPORTE
Luns 27 de xullo do 2009
Un total de 200 nenos e nenas participan na 'XVI Escola de Verán' e na '5ª Escola de Xogo e Iniciación Deportiva para Peques' que organizan as Escolas de Balonmán Xiria, coas que colabora o Concello de Carballo. Están dirixidas para nenos e nenas de entre 3 e 12 anos e inclúen actividades deportivas, lúdicas e culturais que se desenvolven tanto no Pavillón Vila de Noia como no CEIP Fogar entre o 6 de xullo e o 4 de setembro. Precisamente no CEIP Fogar vén de ter lugar a presentación das escolas cos seus monitores e con todos os nenos e nenas que participan, nun acto que contou coa presenza da Concelleira de Benestar, Dores Silveira; da Concelleira de Educación, Mar Eirís; e do Concelleiro de Deporte, Marcos Trigo, departamentos que colaboran con estas escolas.
SESIÓN PLENARIA ORDINARIA DO MES DE XULLO
Venres 24 de xullo do 2009
A corporación celebra o luns 27 de xullo a sesión plenaria ordinaria relativa ao mes de xullo na que o principal asunto da orde do día é a aprobación definitiva da Relación de Postos de Traballo (RPT) do Concello de Carballo. Despois dun longo proceso iniciado no anterior mandato, agora o documento, que conta co apoio de todas as organizacións sindicais, pasará o seu visto e prace definitivo. A RPT inclúe unha relación da estrutura organizativa de tódolos postos de traballo do Concello -nestes momentos uns 200- e valora cada posto de traballo e qué obrigas lle corresponden a cada empregado. Pretende, entre outras cousas, a "redución da precariedade laboral", "crear unha estrutura equitativa de salarios" e "orientar a capacitación profesional de cada traballador", en verbas do Alcalde, Evencio Ferrero.
CONCELLARÍA DE DEPORTE
Venres 24 de xullo do 2009
O Alcalde de Carballo, Evencio Ferrero, e o Concelleiro de Deporte, Marcos Trigo, veñen de recibir na Casa do Concello ao equipo feminino cadete da Asociación Deportiva Fogar, que se proclamou o pasado 4 de xullo Campión de España de Triatlón por equipos na proba disputada na vila pontevedresa do Grove. Pasan a sumar o seu cuarto título de campionas na categoría cadete, revalidando os logros de 2005, 2006 e 2007. O Alcalde quixo entregarlles un agasallo conmemorativo e felicitalas polos seus logros deportivos, ademais de instalas a seguir traballando, especialmente coa teima de "potenciar o deporte feminino en Carballo".
CONCELLARÍA DE BENESTAR
Xoves 23 de xullo do 2009
A Concellaría de Igualdade e Benestar, a través dos Servizos Sociais do Concello de Carballo, cofinancia e colabora na iniciativa ‘Escola de Xogo e Iniciación Deportiva para Peques’, organizada pola Asociación Deportiva Xiria, o Padroado Municipal e Vieiro. Trátase dunha iniciativa lúdico deportiva dirixida a nenos e nenas de 3 a 12 anos. As actividades englobadas na escola (deportivas e culturais, educación física de base, psicomotricidade, xogos populares, xogos na piscina, inglés, informática, manualidades, excursións ao monte ou a praia, etc.) supoñen unha forma distinta de aproveitar o tempo de lecer dos nenos nas súas vacacións escolares.
OBRAS DO FONDO ESTATAL DE INVESTIMENTO LOCAL (FEIL)
Xoves 23 de xullo do 2009
Os operarios da empresa Construcciones Alejandro Martínez e Hijos SL veñen de principiar os traballos para a urbanización das rúas Saúde, Vitoria e Cinceiro da capital municipal carballesa, un proxecto incluído no Fondo Estatal de Investimento Local (FEIL). Mentres que o mércores a empresa realizou o traslado de materiais e instalou a caseta de obra, o xoves 23 o corte ao tráfico rodado na rúa Saúde (entre a rúa Cinceiro e a Luis Calvo) marca o principio das melloras. A actuación conta cun orzamento de 227.710 euros e cun prazo de execución de catro meses. Durante este tempo, os cortes de tráfico iranse alternando entre estas tres rúas dependendo do desenvolvemento das obras.
.jpg)