A OBRA ACADOU UNHA PUNTUACIÓN DE 4,81
Luns 16 de novembro do 2009
A organización do Festival Internacional Outono de Teatro (FIOT '09) informa de que, unha vez feito o reconto e analizadas as puntuacións emitidas polos espectadores ao longo dos dez espectáculos de teatro de sala, o Premio do Público 2009 é para 'Seis clases de baile en seis semanas' de Pentación Espectáculos (na imaxe), que participou no festival o domingo 1 de novembro con grande éxito de público e coa presenza dos coñecidos actores Lola Herrera e Juanjo Artero. Este galardón consiste en invitar a esta compañía, que acadou unha puntuación de 4,81 sobre 5, a unha futura edición do FIOT. A segunda compañía clasificada foi Teatro Corsario con 'El caballero de Olmedo' e unha puntuación de 4,5, e o terceiro posto, con 4,4, foi para a compañía galega Teatro do Noroeste e o seu espectáculo 'Glass City'.
13 E 14 DE NOVEMBRO NO PAZO DA CULTURA
Venres 13 de novembro do 2009
O salón de actos do Pazo da Cultura de Carballo acolle durante os días 13, 14, 20 e 21 de novembro as 'III Xornadas de historia. Alfredo Brañas: contexto e ideario', nas que diversos estudosos do autor farán unha análise da súa figura, obra e pensamento. Xosé Manuel Beiras, Xan Fraga e Xosé Ramón Freixeiro Mato serán os que se encarguen de abrir as ponencias na primeira fin de semana destas xornadas, que se enmarcan nos actos do 150 aniversario do nacemento do pai do rexionalismo, e o veciño máis ilustre da vila carballesa. Esta cita, organizada pola Asociación Socio-Pedagóxica Galega (AS-PG) e polo Concello de Carballo, teñen lugar no Pazo da Cultura da vila bergantiñá.
PROXECTO 'VIAXE CARA A VIDA'
Venres 13 de novembro do 2009
O Concello de Carballo vén de subscribir un convenio coa asociación sen ánimo de lucro Terra de Homes para desenvolver no municipio o proxecto 'Viaxe cara a vida', un programa de asistencia médica para nenos e nenas que padecen patoloxías que non poden ser tratadas nos seus países de orixe, especialmente de África. Os menores viaxan ata Galicia para poder ser atendidos no Hospital Materno Infantil, e durante a súa estadía viven non só no centro sanitario, senón nunha familia de acollida ata a súa completa recuperación. O Concello, ademais dunha achega económica, vai favorecer a implantación do proxecto coa celebración de varios actos de sensibilización para animar aos veciños e veciñas a que se fagan voluntarios e colaboren coa entidade.
VENRES 13, SÁBADO 14 E DOMINGO 15 DE NOVEMBRO
Xoves 12 de novembro do 2009
O venres 13 de novembro arrinca o programa do Novembro con música '09 cunha oferta moi variada de estilos musicais. O primeiro día chega a percusión con vocación internacional de Omar Percussion Group (na imaxe), pero ese mesmo día tamén se celebra a quinta edición do festival de rock 'Live in Cances', no que actuarán grupos locais como The Cerne, Killer Cats e Versión Imposible. O sábado 14 a proposta é completamente diferente, co tradicional Festival de Corais. E a fin de semana remata cunha oferta dirixida aos máis cativos e cativas, enmarcada dentro do programa En familia. Artestudio Teatro representa un espectáculo de música e contacontos titulado 'A haima de Agmed'. Variedade e ofertas para todos os públicos neste comezo do Novembro con música '09.
DO 28 DE NOVEMBRO AO 6 DE DECEMBRO
Mércores 11 de novembro do 2009
A Concellaría de Promoción Económica que dirixe Xosé Manuel García Guillín anuncia a celebración da segunda edición do Feirón de Outono o próximo domingo 29 de novembro. Poren, como vén sendo habitual nas últimas convocatorias, as actividades esténdense máis aló da xornada de feira, nesta ocasión, coa celebración dun Mercado de Artesanía que ten lugar entre o 28 de novembro e o 6 de decembro na Praza do Concello. Nesta cita, que se celebra por primeira vez en Carballo, está prevista a presenza de artesáns chegados dende todos os puntos de España, como Valladolid, Asturias, Granada, Ourense, Salamanca, Valencia, Cáceres e o propio Carballo. E haberá postos con produtos como coiro, prata, herbas medicinais, pedras semi preciosas ou madeira.
CONCLUSIÓNS DO PROGRAMA 'DE TI DEPENDE. CARBALLO SOSTIBLE'
Mércores 11 de novembro do 2009
O Concello de Carballo vén de presentar as conclusións do programa de actividades 'De ti depende. Carballo sostible' que durante máis dun mes se ten desenvolvido no Pazo da Cultura en torno ao urbanismo e a sustentabilidade. Despois da realización de obradoiros de sensibilización e divulgación, de xornadas formativas e de foros de participación dirixidos a técnicos municipais, a veciños e veciñas en xeral e ao tecido empresarial do Concello, as conclusións apuntan a que Carballo fixo un gran esforzo en materia medioambiental na última década. Poren, tamén se teñen detectado novas necesidades, segundo apuntou Roberto González, de OBZ Consulting, empresa responsable da realización das actividades. Entre elas, a creación de infraestruturas para transportes alternativos como a bicicleta, a mellora dos recursos dispoñibles para os peóns, ou a ampliación da gama de residuos a reciclar.
MÚSICA DE TODOS OS ESTILOS PARA TODOS OS PÚBLICOS
Luns 9 de novembro do 2009
Un ano máis chega ao outono de Carballo o programa 'Novembro con música', coa vocación de concentrar distintas épocas e estilos, grupos profesionais e afeccionados nunha oferta para todos os públicos. Así o manifestou a Concelleira de Cultura, Belén Lendoiro, durante a presentación das actividades, nas que ten especial importancia a difusión do traballo das agrupacións musicais de Carballo, así como as propostas para toda a familia. Un total de dez concertos protagonizados por 23 agrupacións conforman unha oferta dun "mes da música" no que se plasma unha "programación estable na que calquera idade pode ter encontro", en verbas do Alcalde, Evencio Ferrero. Todos os concertos serán de balde no Pazo da Cultura entre o 13 de novembro e o 5 de decembro.
XUNTA DE GOBERNO LOCAL
Luns 9 de novembro do 2009
A Xunta de Goberno Local vén de aprobar en sesión ordinaria a adxudicación provisional dos traballos para a execución dun centro social na parroquia de Cances, en Cances da Vila (vista da parroquia na imaxe). O prezo de adxudicación é de 266.577,65 euros, o que supón unha baixa dun 17 por cento sobre o orzamento base de licitación, de 321.177,89 euros. A empresa encargada de realizar as obras será Construcciones Riotorto, que oferta un prazo de execución de sete meses. Hai que lembrar que xa na Xunta de Goberno do pasado 10 de outubro tíñase sacado adiante a cesión dos terreos necesarios, e que o proxecto poderá realizarse a través dun acordo coa Deputación da Coruña, que achegará o 80 por cento do orzamento global do proxecto. O obxectivo é que o novo centro social entre en funcionamento no curso 2010-2011.
A CONSELLEIRA DE TRABALLO E O ALCALDE CORTARON A CINTA INAUGURAL
Venres 6 de novembro do 2009
O casco urbano carballés conta a partir de hoxe cun novo espazo público e de ocio. A Conselleira de Traballo, Beatriz Mato e o Alcalde de Carballo, Evencio Ferrero, veñen de cortar a cinta inaugural da Praza Eduardo Pondal, situada na rúa do mesmo nome, no entorno do CEIP Bergantiños. Os traballos foron realizados polos preto de 40 alumnos e alumnas da Escola Obradoiro de Carballo, que crearon un espazo de 2.100 metros cadrados no que se teñen empregado materiais de alta calidade e compoñentes de alta resistencia e durabilidade. Así mesmo, a nova praza conta con 450 metros cadrados destinados a xogos infantís. No acto de inauguración tamén estiveron presentes o Tenente de Alcalde, José Antonio Viña, a Concelleira de Formación, María Manso e numerosos membros da corporación, así como os alumnos e profesores da Escola Obradoiro.
SEGUNDO O ESTUDO DIRECTOR REALIZADO POR EYSER ENXEÑERÍA
Venres 6 de novembro do 2009
O territorio municipal de Carballo conta con recursos de auga suficientes como para garantir o abastecemento da poboación do Concello e dos futuros asentamentos industriais a "moi longo prazo". Así o indica o 'Estudo director para a mellora do abastecemento no termo municipal de Carballo' realizado por Eyser Enxeñería a petición da Administración Local. O Alcalde de Carballo, Evencio Ferrero, tamén subliña que "a rede hídrica é o bastante boa como para non ter que construír un encoro". Poren, o estudo inclúe un plan de actuacións a curto, medio e longo prazo cun orzamento de 9.035.600 euros e un horizonte de execución datado no ano 2025, cando a poboación do Concello, segundo as previsións, sería de preto de 45.000 habitantes, e o chan industrial de 25 hectáreas.
APOSTA POLO FERROCARRIL COMO MEDIO DE TRANSPORTE
Xoves 5 de novembro do 2009
Representantes do Concello e do Eixo Atlántico colaboran para planificar de forma conxunta a vertebración da mobilidade e do transporte no municipio e na Costa da Morte. Ambas institucións veñen de celebrar hoxe en Carballo unha xuntanza de traballo para definir e matizar os aspectos que afectan ao seu desenvolvemento, centrado en dous puntos principais: a súa importancia estratéxica pola proximidade coa Coruña e o Porto Exterior e con Santiago de Compostela; e o seu poder de liderado como cabeceira de comarca e porta de entrada á Costa da Morte. Nesta reunión estiveron presentes o Secretario Xeral do Eixo Atlántico, Xoán Vázquez Mao; o Coordinador dos Estudos de Transporte, Luis Domínguez; o responsable de Planificación do Eixo, Martín Prado; o Alcalde de Carballo, Evencio Ferrero; e o Tenente de Alcalde, José Antonio Viña, entre outros.
EN OUTUBRO O TELECENTRO EMPREGOUSE EN PRETO DE 600 OCASIÓNS
Xoves 5 de novembro do 2009
A Rede de Dinamización da Sociedade da Información que ten a súa sede no Telecentro informa de que durante o pasado mes de outubro impartiu un total de nove obradoiros tecnolóxicos, a través dos que se formou a 72 persoas e que se estenderon ao longo de 68 horas. Os obradoiros impartidos este mes foron 'Iniciación á Informática', 'Iniciación á Internet e 'Creación de correo electrónico'. Cabe tamén destacar outros levados a cabo como 'Currículo a través do ordenador' e 'Procura de emprego a través de Internet', que poñen de manifesto a diversidade formativa da Rede. Asemade, 73 persoas inscribíronse como novos usuarios e usuarias da Rede para poder aproveitar -sempre de xeito gratuíto- as instalacións e todas as iniciativas que se ofertan nas horas de aula aberta do Telecentro, que foi utilizado nun total de 588 ocasións.
.jpg)