.jpg)
O alumnado do obradoiro de emprego Carballo Coida II remata a súa formación con boas expectativas de inserción laboral
O concelleiro de Formación e Emprego, Iván Andrade, fixo entrega dos diplomas ás participantes e animounas a seguir formándose
Venres 22 de novembro do 2024
Para o alumnado-traballador do obradoiro dual de emprego Carballo Coida II, centrado na atención sociosanitaria a persoas dependentes en institucións sociais, chegou o momento de enfrontarse ao mercado laboral. As expectativas son moi boas, xa que a demanda de persoal no sector sociosanitario é enorme.
Hoxe recolleron os seus diplomas nun acto no que participou o concelleiro de Formación e Emprego, Iván Andrade, que agradeceu a implicación das 20 participantes (19 mulleres e un home) e animounas a seguir formándose. Nese sentido, a Concellaría de Formación e Emprego aposta non só por un novo curso de atención sociosanitaria a persoas dependentes en institución sociais, que comezará o 16 de decembro, senón que, de cara ao vindeiro ano, está programada unha acción formativa de teleasistencia novidosa en todo o ámbito da Costa da Morte.
O alumnado o obradoiro dual de emprego Carballo Coida II debe solicitar agora o certificado de profesionalidade para poder empezar a traballar. Na Bolsa de Traballo (BDT) do Concello de Carballo xa hai ofertas de emprego axustadas ao seu perfil, como indicou a responsable do servizo, Milagros Antelo.
O Concello agradeceu a colaboración das entidades e institucións sociais
Ao acto de hoxe tamén asistiron representantes das entidades nas que desenvolveron as súas prácticas as alumnas do curso _Asociación de pais de discapacitados psíquicos de Bergantiños (Aspaber), Asociación de familiares de enfermos de alzhéimer e outras demencias de Bergantiños (Afaber), Asociación Íntegro das persoas con diversidade funcional da Costa da Morte, Asociación Pro Enfermos Mentais (APEM) e Centro de día do Consorcio Galego de Servizos de Igualdade e Benestar_ que renovaron o seu compromiso de colaboración de cara ás vindeiras accións formativas.
O obradoiro dual de emprego Carballo Coida II foi un proxecto impulsado polas concellarías de Formación e Emprego e Servizos Sociais e subvencionado pola Xunta de Galicia. Antes de fin de ano arrincará o Obradoiro Lubiáns, neste caso en colaboración co Concello de Coristanco e centrado no sector da carpintaría e a montaxe de mobles. As persoas interesadas poden informarse nas oficinas do Servizo de Emprego Público de Galicia, na planta baixa do Fórum.