A aprobación definitiva do plan especial das casas dos mestres permitirá iniciar os trámites para derrubalas e construír un edificio social
A proposta presentarase no pleno ordinario do luns 31 de outubro, no que se abordarán un total de 17 asuntos
Venres 28 de outubro do 2022 Carballo ao día
![](media/../media/img/0cruz_vermella.jpg)
Despois de dous meses de exposición pública e da tramitación das autorizacións sectoriais pertinentes ante as administracións estatal e autonómica, o Concello de Carballo recibiu esta semana o último informe relativo ao plan especial das casas dos mestres (PERI-2), “co cal imos proceder á aprobación definitiva no pleno ordinario deste luns”, segundo anunciou hoxe o alcalde.
Evencio Ferrero indicou que a partir da aprobación definitiva xa poderá redactarse, por unha banda, o proxecto de demolición, e, por outra, iniciar a tramitación do expediente para a construción dun edificio que poida dar cabida ás entidades sociais que desenvolven a súa actividade no noso concello, facilitando e impulsando a atención ás necesidades da cidadanía.
O plan especial, que é un documento imprescindible para poder acometer a construción dun edificio para as entidades sociais, afecta a unha superficie de 2.575 metros cadrados. Segundo a proposta inicial, a reforma integral dese ámbito permitiría acometer a construción dun edificio social, unha praza e mesmo un aparcamento, ademais de regularizar o viario.
O alcalde deu a coñecer hoxe os asuntos que se debaterán no pleno do luns 31 de outubro, entre os cales tamén figuran a proposta de adhesión de Carballo á Rede de cidades saudables, as expropiacións para o proxecto de Augas de Galicia na Cepeira ou varias bonificacións de ICIO para novas empresas. Tamén está prevista a comparecencia, ao remate da sesión, dunha representante das traballadoras dos centros dependentes do Consorcio Galego de Servizos de Igualdade e Benestar que desenvolven o seu labor no noso concello. Podes descargar a orde do día máis abaixo.