13 persoas participan nas xornadas sobre xestión administrativa e financiamento para emprendedores/as organizadas polo Carballo Coworking
As sesións, impartidas por Ana Belén Muñiz Vera, desenvólvense entre hoxe e mañá
Luns 28 de xuño do 2021 Carballo ao día
![As sesións comezaron hoxe no auditorio do Fórum As sesións comezaron hoxe no auditorio do Fórum](media/../media/img/28062021_curso_administracion_coworking_(1).jpg)
As sesións comezaron hoxe no auditorio do Fórum
Un total de 13 persoas participan desde esta mañá na nova actividade formativa organizada polo Carballo Coworking e impulsada desde a oficina de Promoción Económica do Concello de Carballo. Trátase dunhas xornadas informativas sobre xestión económica e financiamento, dirixidas preferentemente a usuarios e usuarias deste espazo de traballo colaborativo, ás que tamén acoden emprendedores/as e autónomos/as, pemes, startup e persoas cunha idea de negocio.
A actividade, que se celebrará hoxe e mañá no auditorio do Fórum Carballo, en horario de 10:00 a 12:00, consta de dúas sesións teórico prácticas impartidas por Ana Belén Muñiz Vera, xestora administrativa e licenciada en Administración e Dirección de Empresas, con ampla experiencia en asesoramento empresarial, ademais de formadora no coworking do Pazo de Arenaza e no programa da Fundación Equipo Humano “Se buscan héroes”, orientado á mellora da empregabilidade.
A xornada de hoxe xirou arredor da xestión administrativa e a tramitación online. Ademais de abordar cuestións básicas laborais e fiscais relacionadas co emprendemento, a Seguridade Social e a Axencia Tributaria, os/as asistentes tiveron a oportunidade de expoñer dúbidas sobre cuestións do seu día a día como a alta en autónomos, o Imposto de Actividades Económicas, libros de rexistros, declaracións, sede electrónica, xestións telemáticas, etc. Deste xeito, preténdese mesturar as clases teóricas con sesións prácticas e quendas de preguntas coa finalidade de acadar unha maior participación e implicación dos/as participantes.
Para mañá 29 está previsto abordar as diferentes liñas de financiamento para proxectos emprendedores e/ou empresas de recente creación, atendendo a unha das principais demandas formativas actuais, ademais de prestar apoio e asesoramento ás persoas que inician unha actividade empresarial. Ao remate procederase á entrega de diplomas a todos/as os/as asistentes.