Entran en vigor as novas restricións establecidas pola Xunta para a comarca de Bergantiños agás o concello da Laracha

No noso concello acadáronse hoxe os 154 casos activos, 39 deles en centros educativos

Venres 13 de novembro do 2020 Carballo ao día

Hoxe reuniuse a comisión municipal de seguimento da COVID-19

O Diario Oficial de Galicia publicou a última hora da tarde do venres o decreto da Presidencia da Xunta polo que se establecen novas medidas de prevención da COVID-19 no ámbito territorial delimitado de forma conxunta polos concellos de Cabana de Bergantiños, Carballo, Coristanco, Laxe, Malpica de Bergantiños e Ponteceso. As medidas entran en vigor este sábado 14 e manteranse, en principio, durante un mes.

Que establece o decreto?

Que a permanencia de grupos de persoas en espazos de uso público, tanto pechados como ao aire libre, e en espazos de uso privado quedará limitada aos grupos constituídos só por persoas conviventes. Podes lelo aquí: https://www.xunta.gal/.../2482/AnuncioC3B0-131120-1_gl.html

Que outras medidas se adoptan?

As mesmas que están vixentes xa noutros concellos galegos, como Vimianzo, ou agrupacións de concellos, como os da área da Coruña. Podes consultalas aquí: https://www.xunta.gal/.../2476/AnuncioC3K1-041120-2_gl.html. As máis significativas son as seguintes:

• Establecementos de hostalaría e restauración: permanecerán pechados ao público. Poderán prestar servizo de entrega a domicilio e para a súa recollida no local e consumo no domicilio. Os establecementos de lecer nocturno: permanecerán pechados ao público.
• Lugares de culto: asistencia reducida a un terzo da súa capacidade. Nas cerimonias relixiosas ou civís: 50% da capacidade, cun máximo de 25 persoas. A celebración posterior á cerimonia non está permitida.
• Bibliotecas, museos, arquivos, salas de exposicións e outros equipamentos culturais: ao 50% da capacidade. As actividades culturais en grupo serán só de conviventes.
• Cines, teatros, auditorios e recintos ao aire libre: máximo de 30 persoas, en espazos pechados, e de 75, ao aire libre. Público sentado.
• Circos e espectáculos feirais, e parques multiocio: permanecerán pechados.
• Congresos, eventos, conferencias e reunións de negocio: ao 50% da capacidade, cun máximo de 30 persoas en espazos pechados, e de 75, ao aire libre.
• Centros de lecer infantil: pechados
• Establecementos e locais de xogo e apostas e salóns: pechados
• Actividades e instalacións deportivas non federadas: actividade ao aire libre individual e colectiva (só conviventes), sen contacto físico.
• Instalacións e centros deportivos: non poderán superar o 50% da capacidade. Só actividades individuais (sen contar ao monitor).
• Celebración eventos deportivos, adestramentos e competicións deportivas con público: ao 50% da capacidade, cun máximo de 30 persoas, en espazos pechados; e de 75, ao aire libre. Público sentado.
• Actividades de tempo libre, dirixidas á poboación infantil e xuvenil: Ao aire libre limítase o número de participantes ao 50% da asistencia habitual, cun máximo de 50 participantes. En espazos pechados limítase ao 50% a capacidade do recinto, cun máximo de 25 participantes. Os grupos non deberán superar as 6 persoas, sexan ou non conviventes (sen contacto entre os grupos).
• Piscinas: as recreativas permanecerán pechadas. As de competición, ao 50% da capacidade. Só se permite a actividade individual.
• Centros cívicos e socioculturais: Ao 50% da capacidade.
• Actividades socioculturais: un máximo de 6 persoas, sexan ou non conviventes. Actividades físicas ou deportivas: ao 50% da capacidade e só actividades individuais.

Por que se toman estas medidas?

O decreto alude ao incremento da taxa de incidencia global dos últimos días nesta zona. "Tres dos concellos da comarca amosan taxas superiores aos 1.000 casos por cada cen mil habitantes: Cabana de Bergantiños, Laxe e Malpica de Bergantiños; e, por número de casos acumulados nos últimos 14 días e unha notificación diaria de casos, destaca tamén o concello de Carballo", explica. Os indicadores amosan "valores de alto risco" e destácase, así mesmo, "o feito de que o grupo en que se recollen as taxas máis altas é o de xente nova, en que a infección pode ser asintomática ou pauciasintomática, favorecendo deste xeito a transmisión".

Que mobilidade se permite?

Os veciños e veciñas dos seis concellos poderán manter a mobilidade exclusivamente dentro do perímetro establecido, é dicir, entre os seis concellos. As excepcións son estas:

1. Asistencia a centros, servizos e establecementos sanitarios
2. Cumprimento de obrigas laborais, profesionais, empresariais, institucionais, sindicais e de representación de traballadores ou legais.
3. Asistencia a centros universitarios, docentes e educativos, incluídas as escolas de educación infantil.
4. Retorno ao lugar de residencia habitual ou familiar.
5. Asistencia e coidado, incluído o acompañamento, a maiores, menores, dependentes, persoas con discapacidade ou persoas especialmente vulnerables.
6. Desprazamento a entidades financeiras e de seguros ou estacións de servizo en territorios limítrofes.
7. Actuacións requiridas ou urxentes ante os órganos públicos, xudiciais ou notariais.
8. Renovacións de permisos e documentación oficial, así como outros trámites administrativos inaprazables.
9. Realización de exames ou probas oficiais inaprazables.
10. Por causa de forza maior ou situación de necesidade.
11. Calquera outra actividade de análoga natureza, debidamente acreditada.
12. Non estará sometida a restrición ningunha a circulación en tránsito a través dos ámbitos territoriais en que resulten de aplicación as limitacións previstas nos números 1 e 2.

Ligazóns