En marcha as obras de mellora dos pavimentos con cemento en tres espazos rurais singulares

As obras do campo da festa de Oza están moi avanzadas, e a partir da vindeira semana acometeranse as actuacións previstas en Rus e Artes

Mércores 21 de outubro do 2020 Carballo ao día

Aínda que as xuntanzas dos consellos parroquiais están suspendidas a causa da situación sanitaria provocada pola COVID-19, o Concello de Carballo continúa atendendo as peticións emanadas destes órganos de participación veciñal e dando resposta ás prioridades establecidas en cada unha das parroquias.

A principal demanda do Consello Parroquial de Oza, que consistía na extensión da rede de auga a toda a parroquia, está en vías de solución, xa que as obras da canalización ata Serantes, que tamén chegará á veciña parroquia de Goiáns, están en fase de contratación, e existe ademais o compromiso de levar o servizo ao lugar de Vilar de Uz, completando deste xeito todos os núcleos.

Pero en Oza tamén se estableceu como prioritario o acondicionamento do campo da festa despois da súa adquisición utilizando a fórmula de participación ao 50% entre o Concello e a veciñanza, que está permitindo crear unha rede de equipamentos públicos que responde á demanda e ás necesidades reais da poboación das distintas parroquias. Esa actuación estase en execución nestes momentos dentro do proxecto denominado “Conservación e mellora de pavimentos en varios lugares de Rus, Artes e Oza”, adxudicado á empresa Vázquez y Reino por 281.022,50 euros procedentes do superávit do ano 2018. De feito, os 1,3 millóns de euros resultantes da liquidación do orzamento do 2018 van destinados na súa totalidade á mellora dos servizos na zona rural segundo as peticións recollidas nos consellos parroquiais.

Visita ás obras

O alcalde, Evencio Ferrero, e o concelleiro de Obras e Servizos, Luis Lamas, achegáronse hoxe ata Oza, onde puideron comprobar que as obras están case listas. O proxecto inclúe a pavimentación do campo da festa, así coma dos accesos ao mesmo, con cemento e con cespeado portante para a zona de estacionamento. 

A partir da próxima semana levaranse a cabo as outras dúas actuacións incluídas no proxecto. En Rus, tras o soterramento do cableado da contorna da igrexa, acondicionarase a zona con cemento, o que permitirá, en palabras do alcalde, “darlle realce e prestixio, como merece a igrexa”. E en Artes, onde xa se empezou cos traballos previos ás obras, daráselle resposta á principal demanda do consello parroquial, que, despois do arranxo do centro social e da instalación da rede de saneamento, priorizou a pavimentación da pista.