Evencio Ferrero anuncia unha nova liña de axudas por máis de 600.000 euros destinada a autónomos e pequeno comercio
Publicadas as bases das axudas “Sempre Carballo”, das que poderán beneficiarse todos os veciños e veciñas maiores de 18 anos
Xoves 20 de agosto do 2020 Carballo ao día
![Evencio Ferrero, alcalde de Carballo Evencio Ferrero, alcalde de Carballo](media/../media/img/evencio_ferrero_800x460.jpg)
Evencio Ferrero, alcalde de Carballo
“Debemos impulsar o comercio de proximidade, que é o que nos dá estrutura como pobo, e intentar que a COVID-19 o debilite o menos posible”, sinalou hoxe o alcalde, Evencio Ferrero, en alusión ás distintas accións que se veñen impulsando dende o Concello de Carballo para tratar de combater os efectos negativos que a crise sanitaria está tendo na economía, tanto a nivel global coma local.
A iniciativa estrela, as axudas “Sempre Carballo”, constitúen unha fórmula novidosa que, ademais da inxección indirecta de 700.000 euros na economía local, perseguen a implicación de toda a veciñanza na defensa do comercio e a empresa de proximidade. Hoxe, precisamente, publicamos as bases das axudas, ás que terán acceso todos os veciños e veciñas maiores de 18 anos e empadroados no noso concello antes do 31 de xullo. E tamén hoxe o alcalde anunciou unha nova liña de apoio destinada a autónomos e pemes, que, en colaboración coa Deputación da Coruña, achegará máis de 600.000 euros.
![As terrazas de hostalaría están exentas do pago da taxa anual As terrazas de hostalaría están exentas do pago da taxa anual](media/../media/img/terraza_800x460.jpg)
As terrazas de hostalaría están exentas do pago da taxa anual
En total, máis de 1,3 millóns de euros, que se suman a outras iniciativas de axuda á empresa local promovidas nos últimos meses, como a exención da taxa pola ocupación de solo público con terrazas de hostalaría para todo o ano 2020, a campaña de dinamización das compras nas librarías locais con premios en bonos para os establecementos do sector ou a posta en marcha dun servizo de asesoramento e apoio, que segue a disposición da empresa local e dos/as traballadors/as a través da páxina web http://covid19.carballo.gal/.