Carballo sitúase entre os concellos coa mellor proporción de recollida selectiva de roupa cun contedor por cada 900 habitantes
O Concello e Humana practicamente duplican o número de contedores na vía pública, que pasan de 19 a 34
Xoves 10 de outubro do 2019 Carballo ao día
![Os contedores de roupa están repartidos por todo o concello Os contedores de roupa están repartidos por todo o concello](media/../media/img/55800x460.jpg)
Os contedores de roupa están repartidos por todo o concello
Humana Fundación Pobo para Pobo, que desde 1987 promove a protección do medio ambiente a través da reutilización de téxtil e leva a cabo programas de cooperación ao desenvolvemento en África, América Latina e Asia así como de apoio local en España, ampliou o número de puntos de recollida de roupa usada en Carballo para facilitar as doazóns da cidadanía. En agosto instaláronse 15 contedores máis, de maneira que o número pasou de 19 a 34.
Grazas á estreita colaboración entre ambas as partes e ao profundo compromiso do Concello coa prevención de residuos e a sustentabilidade foi posible dar un paso decisivo para lograr unha efectiva recollida selectiva de téxtil. A iniciativa consiste en case duplicar o número de puntos de recollida na vía pública para aumentar a visibilidade dos contedores, así como a accesibilidade para realizar doazóns de roupa. A finalidade é ratificar con datos obxectivos que canta maior é a contenerización e a facilidade para depositar os residuos, máis elevadas son as porcentaxes de recuperación selectiva.
En España, a proporción entre o número de contedores e habitantes sitúase en 1 por cada 5.000, un rexistro que impide conseguir niveis óptimos de recollida selectiva de téxtil. Coa ampliación levada a cabo en Carballo, a cociente é dun por cada 900 habitantes. “Queremos certificar que unha contenerización correctamente dimensionada é clave para recuperar unha maior cantidade de téxtil e cumprir os obxectivos da Unión Europea en materia de residuos”, explica o responsable de Humana en Galicia, Ricardo Rodríguez, en referencia á decisión de Bruxelas de reciclar como mínimo o 55% dos residuos municipais, incluído o téxtil, a partir de 2025. “Desafortunadamente, e a pesar de que o residuo téxtil é unha das fraccións cunha porcentaxe de valorización máis alto, apenas se recupera un 10% de todas as pezas que os galegos refugamos anualmente”, asegura Rodríguez.
Unha iniciativa similar na Comunidade de Madrid
![Clasificación da roupa Clasificación da roupa](media/../media/img/Humana_clasificacion_(1).jpg)
Clasificación da roupa
Os resultados en Carballo poderanse valorar, como mínimo, ao cabo dun ano. En España só hai outro municipio onde Humana impulsa unha iniciativa similar: trátase de Rivas Vaciamadrid (Comunidade de Madrid), onde a proporción é dun contedor de téxtil por cada 400 habitantes, o cociente máis reducido en todo o país. A medida aplícase desde o pasado mes de maio e a recollida selectiva aumentou un 49% ata a data, en comparación co mesmo período do ano pasado. “Os resultados que logremos en ambos os casos servirán para avalar esta medida noutros municipios”, avanza o responsable da Fundación en Galicia.
As pezas depositadas nos contedores de Humana teñen dous destinos: o 85% trátase nas tres plantas de preparación para a reutilización da Fundación (en Madrid, Barcelona e Granada) e o resto véndese a empresas de reutilización e reciclado.