Asinados os contratos para a execución das obras de mellora da accesibilidade na rúa Laracha e urbanización da González Tiradas
O Concello de Carballo investirá 272.708,71 euros nestes novos proxectos, que permitirán seguir mellorando os servizos nos barrios
Xoves 15 de novembro do 2018 Carballo ao día
![Sinatura dos contratos das dúas fases da rúa Cándido González Tiradas Sinatura dos contratos das dúas fases da rúa Cándido González Tiradas](media/../media/img/015112018_gonzalez_tiradas_lancer_(1)_800x460.jpg)
Sinatura dos contratos das dúas fases da rúa Cándido González Tiradas
O alcalde de Carballo, Evencio Ferrero, asinou hoxe dous novos contratos que permitirán seguir mellorando os servizos e a accesibilidade nos barrios, neste caso nos de Pedra Furada e A Braña.
Na primeira zona, a empresa Lancer Proyectos y Obras executará a reurbanización da rúa Cándido González Tiradas. O proxecto divídese en dúas fases. A primeira, que foi adxudicada por 86.952,66 euros, desenvolverase nunha superficie de 630 metros cadrados, concretamente entre o cruce coa rúa Antonio Vázquez Mouzo e a Alcalde Monteagudo. A segunda custará 92.949,05 euros, e desenvolverase entre Antonio Vázquez Mouzo e Rodríguez Sesmeros, cunha superficie de 943 metros cadrados. O obxectivo é dotar a rúa de todos os servizos urbanísticos, dos que agora carece, e proceder á pavimentación da zona de circulación e á construción de beirarrúas. O proxecto complétase co pintado das zonas de aparcamento e os carrís, a colocación de papeleiras e a plantación de árbores e crecemento lento.
![Sinatura do contrato da rúa Laracha Sinatura do contrato da rúa Laracha](media/../media/img/15112018_rua_laracha_(3)_800x460.jpg)
Sinatura do contrato da rúa Laracha
Na zona da Braña acometerase a mellora da accesibilidade na rúa Laracha, adxudicada á empresa Construcciones Ramón Vázquez y Reino por un importe de 92.807 euros. A obra inclúe a renovación de todos os servizos ao longo dos 133 metros de lonxitude da rúa. Así, cambiaranse as canalizacións da rede de abastecemento de auga, que agora son de fibrocemento; instalarase rede separativa de pluviais e residuais, que non existe, e completarase a canalización de gas. Tamén se prevé a formación de beirarrúas e a reposición do pavimento afectado polas instalacións. Así mesmo, pintaranse as prazas de aparcamento e a vía e colocaranse sinais de tráfico novos.