NOVAS TECNOLOXÍAS

Carballo pon en marcha un plan de viabilidade para poder dotar ao rural de cobertura de banda ampla

Xoves 24 de xullo do 2008

Así o explicou o Concelleiro de Promoción Económica, Xosé Manuel García Guillín, durante a presentación deste estudo, á que tamén acudiu o Alcalde, Evencio Ferrero. Guillín engadiu que nestes momentos o Concello xa entrou en negociacións con algunhas das empresas, que serían as que asumirían os gastos da instalación das infraestruturas necesarias para ofrecer o servizo.

Nestes momentos, o 35 por cento dos residentes no rural carballés non poden acceder a internet de banda ampla, e moitos nin sequera teñen acceso á liña de teléfono fixo. O estudo revela casos como o de Cances, no que só as vivendas próximas á estrada AC-414 contan co servizo; o de Sísamo, no que poden chegar a tardar oito meses en instalar o acceso ao teléfono fixo; ou o de Razo, no que a demanda vai moi por diante da conectividade. Mesmo nas proximidades do núcleo urbano hai algún baleiro, como o existente na Avenida dos Abetos, que carece de banda ampla.

O Alcalde, Evencio Ferrero, subliñou que o Concello xa detectara hai tempo as deficiencias existentes no rural, de aí a necesidade da elaboración do estudo e de tomar medidas ao respecto. "Esperemos que a solución facilite a conectividade a una velocidade que permita empregar o servizo con soltura", rematou o rexedor.