TEATRO

Juan Luis Galiardo protagoniza "Un home de sorte" no Pazo da Cultura

Mércores 28 de setembro do 2005

Un home de sorte presenta a traxectoria vital dun actor xa retirado, interpretado por Juan Luis Galiardo, que fai un balance de grandezas e miserias con moito sentido do humor. A obra é o produto do traballo dun grupo de profesionais de recoñecido prestixio no mundo do teatro e do cinema español.

A obra é un monólogo, dirixido por José Luis García Sánchez, con imaxe plástica realizada polo artista Eduardo Úrculo e unha escenografía de Carlos Evangelista. Trátase de máis dunha hora de monólogo no que un actor xa retirado - Fernando Sanjuan, interpretado por Galiardo - fai balanzo das miserias e das grandezas da súa vida. O personaxe conta co suficiente sentido do humor e lucidez como para se rir de si mesmo e para dar conta da súa traxectoria vital e profesional sen renunciar á autocrítica.

José Luis Alonso de Santos é director da Compañía Nacional de Teatro Clásico dende o ano 2000, conta con máis de 20 obras estreadas con grande éxito de crítica e público, ademais de ser galardoado con premios coma o Nacional de Teatro.

O director da obra, José Luis García Sánchez, conta no seu currículo cunha ampla filmografía como director e guionista. No ano 1981 debutou profesionalmente como director teatral con Goliardos, a primeira compañía de teatro independente de Madrid. García Sánchez dedícase tamén á literatura infantil e conta con máis de 90 títulos publicados.

Juan Luis Galiardo ten participado como actor en máis dun cento de filmes, nos que traballou baixo a dirección de profesionais como Saura, Berlanga, Cuerda, Charlton Heston, Fernando León ou Gutiérrez Aragón. A súa traxectoria profesional continúa na televisión e no teatro. Foi galardoado con diversos premios ao seu traballo de interpretación coma o Goya grazas ao filme Adeus co corazón.

Na organización da representación de Un home de sorte participan o Concello de Carballo e a entidade Caixanova, ás que se suma a colaboración da Deputación provincial da Coruña. O prezo das entradas é de 6 euros e non é posible facer a reserva de localidades, como ocorre normalmente con outras actuacións organizadas por Cultura.