.jpg)
A modernización da imaxe e a creación de novos servizos reforzan a aposta do goberno local pola dinamización do mercado
O Concello, coa colaboración da Consellería e Economía, investiu 35.000 euros na mellora dos postos e na adecuación e creación de servizos coma unha sala de lactación
Mércores 4 de decembro do 2024 Mercado Municipal
O Concello de Carballo vén de realizar un investimento de 35.482,73 euros no mercado municipal coa finalidade de mellorar os postos e os espazos interiores, homoxeneizar a imaxe e poñer en marcha novos servizos para a clientela. A Consellería de Economía, Industria e Innovación da Xunta de Galicia concedeu con esa finalidade unha subvención de 25.134,53 euros.
Entre as actuacións realizadas figura a creación dunha sala de lactación, que ademais de dar servizo ás numerosas familias que utilizan cada día o parque infantil ou que asisten ás actividades que se celebran no propio mercado, contribúe a atraer novos perfís de consumidores/as. Tamén se acondicionou un dos postos exteriores como sala de formación e exposicións, que, precisamente, vén de acoller unha mostra sobre o traballo das mulleres do mar, e no primeiro andar, que cada vez ten máis uso cultural e lúdico (bailes, actividades de Apego, campamentos infantís, Festival Carballo Interplay, Rúa dos Contos...) tamén se realizaron melloras encamiñadas a fomentar esa oferta tan diversa de actividades.
Na planta principal, a Concellaría de Feiras e Mercados apostou pola homoxeneización da imaxe interior dos postos, continuando coas melloras realizadas nos últimos anos, e procedeu á instalación de estores que contribúen á mellora da distribución dos postos e, sobre todo, a reducir a pegada térmica nos alimentos, dada a luminosidade do mercado.
Con estas accións, o Concello de Carballo segue apostando polo desenvolvemento do estudo de mellora do mercado municipal que se realizou no ano 2019, e que desde aquela vén marcando as sucesivas actuacións: obras de adaptación aos requisitos da Rede de mercados excelentes (anos 2020 a 2022); adxudicación do servizo de xerencia, conserxería e limpeza, creación dunha oficina de atención ao público, programa de mentorización dos praceiros/as, renovación de cartelaría, sinalética e mobiliario das zonas comúns, rotulación dos postos ou a redacción dun plan de xestión de residuos (ano 2023), e, máis recentemente, novo contrato de arrendamento da cafetaría e novas concesións para un total de catro postos (2024).
