A Federación Española de Salvamento recoñece a aposta do Concello de Carballo polo deporte
A primeira xornada do Campionato de España de Salvamento e Socorrismo incluíu un simulacro de rescate coa intervención do “Helimer”
Xoves 22 de xullo do 2021
![Evencio Ferrero e Jesús Troyano, en Razo Evencio Ferrero e Jesús Troyano, en Razo](../media/img/entrega_agasallo_800x460.jpg)
Evencio Ferrero e Jesús Troyano, en Razo
O vicepresidente da Federación Española de Salvamento, Jesús Troyano, entregou este xoves ao alcalde de Carballo, Evencio Ferrero, un trofeo de recoñecemento ao apoio do noso Concello ao deporte en xeral e ao salvamento en particular. O acto tivo lugar coincidindo coa xornada inaugural do Campionato de España de Verán de Salvamento e Socorrismo na categoría absoluta, que se disputa entre o xoves 22 e o venres 23 en Razo.
![Simulacro de rescate Simulacro de rescate](../media/img/simulacro_helimer_800x460.jpg)
Simulacro de rescate
Ademais de asistir como espectador ao inicio das probas, a estancia de Evencio Ferrero na praia coincidiu co simulacro de salvamento realizado polo helicóptero de rescate “Helimer”, que achegou aínda máis interese á competición estatal. O noso concello está representado polo club Sysca, que vén de colleitar moi bos resultados nas categorías infantil e cadete, e, sobre todo, na xuvenil, na que o club carballés proclamouse campión de España na categoría masculina e acadou o terceiro posto na conxunta xuvenil. Moitos parabéns!
![Ambiente na praia Ambiente na praia](../media/img/ambiente_800x460.jpg)
Ambiente na praia
O campionato de salvamento e socorrismo reúne en Razo a 262 deportistas (114 mulleres e 148 homes) de 33 clubs de toda España. Este é o programa da xornada do venres:
- Eliminatorias e finais
- Bandeiras
- Carreira con táboa de salvamento
- Oceanwoman / oceanman
- Relevo ocean
- Relevo ocean mixto