Sés, Xabier Díaz e as Adufeiras de Salitre, De Vacas, Antía Muíño, Berto e moito máis no Verán Cultural de Carballo
O programa inclúe cinco concertos na Praza do Concello, dous espectáculos infantís na praia de Razo, teatro no Bosque do Añón, nove películas...
Martes 13 de xuño do 2023 Cultura
![Chano Calvo, Evencio Ferrero e Marcos Trigo, na presentación do Verán Cultural Chano Calvo, Evencio Ferrero e Marcos Trigo, na presentación do Verán Cultural](../media/img/121.jpg)
Chano Calvo, Evencio Ferrero e Marcos Trigo, na presentación do Verán Cultural
Vai ser moi difícil superar o nivel do Verán Cultural 2023, porque en só dous meses reuniremos en Carballo a Sés, Xabier Díaz e as Adufeiras de Salitre, De Vacas, Antía Muíño, Berto, o Mago Antón, Galeatro, Paco Nogueiras... Hoxe presentamos o programa ao completo nun acto no que participaron o alcalde, Evencio Ferrero; o concelleiro de Cultura, Marcos Trigo, e o presidente da Fundación Luís Calvo Sanz, Chano Calvo, que un ano máis colabora para que o noso concello continúe sendo unha referencia cultural en Galicia.
Este Verán Cultural será 100% galego. “Ofrecemos unha programación diversa, para todos os públicos e con carácter gratuíto”, apuntou o concelleiro de Cultura, quen ademais destacou a diversidade de espazos nos que se desenvolverán as distintas propostas. Ademais da Praza do Concello haberá actividades na praia de Razo, no Bosque do Añón e nos distintos barrios e parroquias polos que pasarán as Noites de Cine.
Chano Calvo cualificou como “moi bo” o programa cultural do Concello de Carballo para o verán e expresou “o máximo apoio” da Fundación Luís Calvo Sanz, que comprometeu xa para o ano que vén.
O alcalde, pola súa banda, puxo á Fundación Luís Calvo como exemplo de colaboración coa cultura, que neste ano vaise concretar no concerto de Xavier Díaz e as Adufeiras de Salitre. “Esperemos que o verán siga sendo un lugar de encontro para moita xente que nos visita que a xente veña a Carballo a desfrutar dos espectáculos. Agora que estamos nas portas das festas, esa expresión de que parece o San Xoán se manteña durante todo o verán, e que todos os días sexan días de festa”.
O Verán Cultural 2023 arrincará o venres 7 de xullo co concerto de Sés, que coincidirá ademais coa Praza dos Libros. O xoves presentaremos o programa da PLIC pero o do Verán Cultural podes velo máis abaixo.
![](../media/img/A3VeranCultural.png)