Artes

Se queres facerte unha idea do poderío dos señores dos pazos na zona, vén pola parroquia de Artes, moi preto da vila. Artes é coñecida polo pazo de Vilardefrancos, no que, até non hai moitos anos, aínda habitaba o marqués.

O pazo, que foi erguido polos Pardiñas Vilar de Francos, é do século XVIII na súa maior parte, mais conta cunha torre central que se remonta aínda máis atrás, á época de Carlos V.

Pretiño do pazo de Vilar de Francos érguese o carballo de Santo Antón, que colle o nome do santo ao que está adicada a capela do pazo. Actualmente, por mór do paso do tempo e as inclemencias meteorolóxicas, foi crebando e consérvase unha pequena parte do tronco.