Volve o programa Remocea, con máis actividades aínda, para animar ás persoas maiores de 60 anos a manter unha vida activa e saudable e ofrecerlles recursos para mellorar a súa autonomía persoal. Neste obxectivo colaboran diferentes áreas municipais, e por iso na presentación do curso participaron, ademais do alcalde, Evencio Ferrero, os/as concelleiros/as de Terceira Idade, Mar Eirís; Servizos Sociais, Maica Ures; Innovación, Iván Andrade; Deportes, Daniel Pérez, e Mobilidade, Juan Seoane.
Máis de 1.500 persoas maiores de sesenta anos poderán participar nas diferentes actividades. Para chegar á maior parte do territorio e facilitar a implicación de toda a veciñanza estase a realizar un reparto de folletos informativos polas caixas de correo das diferentes parroquias rurais, mentres que na zona urbana poden recollerse na casa do concello, Biblioteca Rego da Balsa, centro de saúde, Servizos Sociais, Fórum, Pazo da Cultura, complexos deportivos e mercado municipal. Tamén pode descargarse ao final desta nova.
Estas son as propostas de Remocea
- Estimulación cognitiva: os talleres de memoria, que teñen moitísima demanda, realizaranse un día á semana, desde outubro ata maio, en 10 centros sociais. Terán prioridade as parroquias nas que non se levasen a cabo o curso pasado.
- Actividades lúdico-formativas: serán tamén un día á semana, desde outubro ata maio, en 10 centros sociais. Este curso modificaremos os contidos, de xeito que haberá actividades diferentes cada mes: arranxos florais, decoración de Nadal, barro e modelado, relaxación, macramé e labores, mobilidade…
- Manexo dos teléfonos móbiles: ao longo do curso realizaranse 10 obradoiros naquelas parroquias nas que haxa un número mínimo de solicitudes.
Para inscribirse nestas tres actividades é preciso cubrir o formulario dispoñible no interior do folleto informativo e entregalo na casa do concello. Tamén pode enviarse a través das asociacións de cada parroquia. O prazo está aberto ata o 12 de setembro.
- Escola de informática: despois da excelente acollida que tivo o ano pasado, o segundo curso da escola de informática desenvolverase de outubro a maio na Aula CeMIT, situada no Pazo da Cultura. Nesta ocasión haberá distintos niveis, para intentar cubrir as necesidades do maior número de persoas posible. As clases serán semanais, de dúas horas de duración. As persoas interesadas deben inscribirse no Fórum Carballo (2º andar do edificio administrativo).
- Programa de exercicio físico: esta actividade, xa clásica no noso concello, vai dirixida a maiores de 65 anos. O curso pasado participaron 700 persoas repartidas en 23 grupos, e para o próximo haberá aínda máis, xa que crearemos o grupo 24 na parroquia de Aldemunde. As persoas interesadas deben dirixirse ás oficinas de Carballo Deporte (rúa Vila de Corcubión).
- Andainas: constitúen unha das novidades deste curso. Son rutas guiadas, deseñadas especificamente para maiores de 60 anos, que teñen como finalidade fomentar a actividade física e tamén o coñecemento do patrimonio cultural e ambiental das nosas parroquias. Nesta primeira edición camiñaremos por Sísamo, Artes, Ardaña e Oza. As andainas realizaranse os días 7, 14 e 28 de setembro e 5 de outubro, en horario de mañá. Máis información, aquí.
- Bailes no mercado: en setembro comezan tamén os bailes no mercado, que se prolongarán ata xuño con actuacións en directo todos os domingos de 18.00 a 21.00 horas. Neste primeiro mes acompañarannos Martín Carrión, o dúo Nuevo Siglo e o dúo Marineda.
E ademais teremos outras actividades puntuais, como o curso de TIC que organizamos coa colaboración da Fundación Amigos de Galicia no mes de setembro, a Universidade Sénior, que arrincará o 14 de outubro, ou MercaEscola, a partir de marzo, entre outras.
O 15% da poboación
As persoas maiores de 60 anos, como indicou a concelleira Mar Eirís, representan case o 15% da poboación do noso concello, e desde o Concello de Carballo pretendemos traballar “sobre todo no ámbito da prevención, tanto no que se refire á saúde física coma á psíquica e á social”. Nese sentido, engadiu a concelleira de Terceira Idade, a proposta inclúe accións destinadas a “fomentar as relacións sociais, combater a soidade e prolongar a súa vida activa”.
O Concello realizará un investimento anual de máis de 150.000 euros, como apuntou o alcalde, que expresou o seu desexo de que, con estas actividades, “a xente remocee en Carballo”.