O Rally Terra de Galicia, que se disputará do 4 ao 6 de setembro, reunirá a 50 pilotos nun percorrido de 375 quilómetros, 100 deles cronometrados, polos municipios de Carballo, A Coruña, Arteixo, Cerceda, A Laracha, Malpica e Ponteceso. O evento, que debuta como proba puntuable no Campionato de España de Rallys de Terra, converterá á provincia no gran escaparate do motor nacional. A competición presentouse este luns na sede da Deputación, ata onde se achegaron os concelleiros Miguel Vales e Luis Lamas.
Carballo será o centro neurálxico da proba. A oficina permanente do rally estará situada no Pazo da Cultura e o parque de asistencias e entrega de placas, na zona do Rego da Balsa. Neste documento poden consultarse os horarios.
A carreira arrincará o venres 5 do circuíto de Bértoa, onde terá lugar o tramo de clasificación que decidirá a orde de saída. Esa mesma xornada, as escuadras disputarán a primeira superespecial en Arteixo antes de trasladarse á praza de María Pita para a saída protocolaria e a firma de autógrafos dos pilotos.
O sábado será o prato forte, un día competo con catro tramos, cada un con dúas pasadas. A primeira sección arrincará en Cerceda, un tramo histórico no calendario galego. A continuación, os pilotos mediranse nun novo percorrido entre Malpica e Ponteceso, que abrirá o rally a unha zona inédita para a afección. Tras o reagrupamento no Pazo dá Cultura de Carballo, pola tarde disputarase o tramo da Laracha e Cerceda, que concluirá no circuíto municipal de Carballo. A entrega de trofeos realizarase na praza de María Pita.
A seguridade será un dos eixos principais. Todos os vehículos estarán controlados por GPS e a velocidade nos recoñecementos limitarase estritamente. A Garda Civil, Protección Civil, Policía Local e máis de 400 persoas entre comisarios, voluntarios e equipos sanitarios velarán polo correcto desenvolvemento da proba.