O litoral de Carballo prepárase para un verán de máxima calidade. Un ano máis, as praias de Baldaio-Saíñas, Pedra do Sal e Razo lucirán a Bandeira Azul, o prestixioso distintivo internacional que avala a pureza das nosas augas e a calidade dos servizos.
Segundo os últimos informes da Xunta de Galicia, as cinco zonas de baño controladas no noso concello —Pedra do Sal, Razo, Arnados, Ría de Baldaio e Saíñas— acadaron a máxima nota: cualificación de excelente.
Pero o recoñecemento non queda na area, porque a Senda do Mar Razo-Baldaio volveu ser distinguida tamén pola ADEAC pola súa beleza e coidado ambiental e somos único concello da Costa da Morte con dobre certificación ambiental (ISO 14001 e EMAS), o que demostra un compromiso real coa mellora continua dos areais.
Preparativos para a tempada estival
Dende a Concellaría de Praias xa se traballa a pleno rendemento na planificación do verán. De feito, a selección do equipo de salvamento e socorrismo está practicamente rematada, e traballamos en colaboración con outras institucións e empresas para garantir que os servizos sexan respectuosos coa contorna.
Este verán será diferente en Razo, onde a Demarcación de Costas está a executar unha intervención estratéxica para frear a erosión e garantir a seguridade. Os puntos clave son:
- Afastar a estrada do mar: desprázase a estrada actual cara ao interior para evitar derrubes e, o máis importante, gañar espazo de area para a praia.
- Senda peonil naturalizada: renóvanse os pavimentos con materiais resistentes e integrados na paisaxe, separando claramente o tráfico de vehículos e peóns.
- Protección ambiental: refórzanse os noiros con solucións naturais (madeira e area) e elimínanse os aparcadoiros en zonas sensibles para reducir a presión sobre o ecosistema.
Para compensar a retirada de prazas na fronte marítima, o Concello de Carballo xa ten en marcha a solución. A Xunta de Goberno Local aprobou definitivamente a expropiación de 11.164 m² de terreo no marco do plan PEPID Razo-Arnados. O novo aparcadoiro abrangue unha área de 5.162 m² situada en zona segura e non sensible, con tres novos accesos que garantirán unha mobilidade fluída e cun investimento de 91.433,16 euros para a adquisición do solo.
Toda esta infraestrutura non serve de nada sen civismo. O sistema de xestión ambiental pon o foco na protección da píllara das dunas, especie en perigo que comparte a praia connosco. Lembra que a presenza de cans está prohibida do 1 de xuño ao 30 de setembro,
O noso obxectivo é facer de Carballo un referente paisaxístico sostible, pero para logralo precisamos da túa axuda, porque a xestión correcta do que levamos á praia é fundamental para manter o noso paraíso intacto.
