Saída de campo para identificar e recoller herbas de San Xoán

A programación infantil da Semana do Medio Ambiente viaxa este xoves, 4 de xuño, cara ás nosas tradicións.

Ás 17.00 horas, con saída desde o mercado municipal, o Grupo Naturalista Hábitat guiará unha sesión divulgativa e unha saída de campo para aprender a identificar as herbas de San Xoán.

Esta actividade constitúe unha xornada de botánica aplicada e etnobotánica, a disciplina científica que estuda a relación entre os seres humanos e o reino vexetal. As persoas participantes aprenderán a identificar e clasificar as diferentes especies a través da observación morfolóxica das súas follas, flores e aromas. Ademais, guiada polos expertos do Grupo Naturalista Hábitat , esta proposta pon o foco na ecoloxía e na sustentabilidade, xa que aprenderemos a recoñecer os hábitats locais e a realizar unha recolleita respectuosa que garanta a conservación da biodiversidade e do patrimonio natural de Carballo.

• Duración aproximada: 3 horas
• Público destinatario: nenos/as a partir de 10 anos e público adulto
• Prazas limitadas
• Inscricións no formulario inferior (unha inscrición por persoa)

A actividade forma parte do Proxecto Talento quilómetro cero (TALK0).

No caso de non poder asistir pode comunicarse por Whatsapp ao 604 072 887.