Por Xela! Música con A Banda da Loba e recital poético

Luns 17 de maio do 2021 20.00 horas - Pazo da Cultura

Proxecto poético e musical para celebrar a vida e a obra de Xela Arias, a escritora homenaxeada no Día das Letras Galegas 2021.

Tres das disciplinas vinculadas a esta escritora, a música, a poesía e a fotografía, estarán presentes da man do grupo A Banda da Loba, das poetisas Estíbaliz Espinosa, Helena Salgueiro, Nuria Vil e Vanessa Glemsel e dos retratos realizados pola súa parella, Xulio Gil.

Ao longo dos temas musicais, igual que coa lectura dos poemarios, poderemos ver a evolución de Xela como poeta. A loita e o inconformismo, a experimentación cos límites da linguaxe, as imaxes poéticas, todo muda e todo permanece na súa poesía, converténdoa nunha das voces de referencia para as xeracións futuras.