Entre as numerosas actividades que vimos desenvolvendo para a normalización e a promoción da lingua galega en diferentes ámbitos, desde as concellarías de Normalización Lingüística e Promoción Económica estamos a realizar por terceiro ano, e nesta ocasión coa colaboración de Axober, un reparto de salvamanteis con pasatempos da revista A píllara, editada polo Concello de Carballo coa colaboración da Asociación Socio-Pedagóxica Galega (AS-PG).
O obxectivo é que mentres agarda por unha tapa, unha ración ou un xantar, a clientela poida entreterse e exercitar o uso da nosa lingua facendo unha sopa de letras ou un anagrama. Axober encargarase do reparto dos salvamanteis entre os establecementos que os soliciten, ata fin de existencias.
Os salvamanteis xa estiveron durante todo o verán a disposición do sector de hostalaría das parroquias costeiras tanto na bibliopraia de Razo coma nos postos de salvamento e socorrismo da zona de Baldaio. A partir desta semana, coincidindo co peche da Praia dos Libros ata o verán que vén, o reparto canalizarase a través de Axober, na que quedou integrada a Asociación de Hostalaría.