O Concello de Carballo segue a apostar pola mellora das instalacións deportivas municippais como parte do seu compromiso coa promoción do deporte e dos hábitos de vida saudables, facilitando á veciñanza espazos de calidade tanto para a competición como para a práctica libre.
Nestes momentos están en marcha actuacións que superan os 400.000 euros. A renovación da pista polideportiva da Milagrosa e do campo de fútbol das Pedreiras, xa rematadas, a próxima mellora da zona de atletismo do Chorís e dun total de nove pistas multideporte en distintas parroquias, así comoa a contratación do mantemento especializado dos oito campos de fútbol municipais forman parte deste programa.
O alcalde, Daniel Pérez, e o concelleiro de Deportes, Daniel Barreiro, visitaron a pista da praza da Milagrosa, que reabrirá en breve, e tamén o campo das Pedreiras, en Verdillo, onde estiveron acompañados polo presidente da SD San Lorenzo, Daniel Padín. Todos valoraron de xeito moi positivo as melloras realizadas e coincidiron na necesidade e no compromiso de continuar mellorando a instalación de Verdillo.
“Queremos que a veciñanza teña a oportunidade de practicar deporte preto da casa. Mellorar estas instalacións é apoiar os clubs e a competición, pero tamén ofrecer espazos de calidade para que calquera persoa poida facer exercicio e gozar do seu tempo libre”, sinalou o alcalde, Daniel Pérez.
Un deseño vinculado ao barrio
A renovación integral da pista da praza da Milagrosa, cun orzamento de 44.168,51 euros, permitiu recuperar unha superficie que presentaba un importante deterioro polo uso continuado. A intervención incluíu o saneamento e a regularización do soporte, a aplicación dun pavimento deportivo multicapa e a renovación das liñas de xogo, ademais da mellora das condicións de evacuación da auga.
A pista, utilizada fundamentalmente para a práctica recreativa de fútbol sala, incorpora un deseño xeométrico e multicolor inspirado nas tradicionais alfombras florais da Milagrosa. A combinación de verdes, azuis, amarelos e laranxas reforza a vinculación da instalación coa identidade do barrio e cunha tradición que tamén utiliza este espazo durante as festas.
Melloras nos campos de fútbol
No campo das Pedreiras, na parroquia de Verdillo, remataron tamén os traballos dun proxecto cun orzamento de licitación de 61.412,72 euros. A actuación abarcou melloras na soleira e na rampla entre as bancadas e a billeteira, nas propias bancadas, nos vestiarios, no equipamento e na iluminación, co obxectivo de ofrecer mellores condicións para os deportistas e o público.
Estas obras compleméntanse co novo servizo de mantemento especializado dos oito campos de fútbol municipais, tanto de céspede artificial coma natural, que vén de ser adxudicado ás empresas Medulio Servicios y Obras e Jardinería Arce. O orzamento para os dous primeiros anos ascende a 58.615,43 euros para os campos de céspede artificial do Carral, en Sofán, e os tres das Eiroas, e a 81.371,90 euros para os de herba natural das Pedreiras, Cances, Razo e Baldaio.
O servizo adapta os traballos ás necesidades de cada superficie. Nos campos de herba artificial inclúe limpeza, cepillado, descompactación, pequenas reparacións e revisión da rega e da drenaxe. Nos de herba natural abrangue segas, fertilización, aireado, escarificado, recebado, resembra e control fitosanitario, coas frecuencias previstas para cada instalación.
Atletismo no Chorís
A mellora das pistas deportivas do Chorís, cun orzamento de licitación de 151.108,56 euros e un prazo de execución de tres meses, conta xa con proposta de adxudicación. O proxecto permitirá renovar o pavimento do anel de atletismo e acondicionar zonas para salto de lonxitude, altura e pértega, ademais dun espazo específico para lanzamento de peso.
A actuación incorpora un pavimento sintético multicapa para exteriores e a marcaxe das disciplinas conforme á normativa deportiva. Dará servizo tanto aos atletas federados como aos centros educativos da contorna e á veciñanza que utiliza as instalacións para facer exercicio.
“Traballamos para atender as necesidades de deportes diferentes e de persoas con formas moi distintas de practicalos: desde quen adestra e compite nun club ata quen utiliza unha pista de maneira libre. A renovación debe ir acompañada dun mantemento continuado, e o noso compromiso é seguir actuando nesta e noutras instalacións nos próximos meses”, destacou o concelleiro de Deportes, Daniel Barreiro.
Investimentos nas pistas de barrios e parroquias
As intervencións dan continuidade ao plan de renovación do equipamento das pistas polideportivas municipais. O ano pasado realizáronse melloras nas pistas polideportivas de Ardaña, Cances, O Chorís, o CEIP Bergantiños, Outón-Rus e Os Vilares-Sísamo.
A Concellaría de Deportes dará continuidade ao programa nos próximos meses con novas actuacións nas pistas de Mirón-Bértoa, centro social de Verdillo, Artes, A Brea, escola de Cances, Oza, Imende-Noicela, O Chorís e San Cristovo. O obxectivo é seguir mellorando os espazos deportivos de proximidade, tanto nos barrios coma nas parroquias, para facilitar a práctica libre e ofrecer á veciñanza instalacións en boas condicións para o deporte e o lecer.