Unha dieta saudable e equilibrada precisa de produtos frescos e da mellor calidade. Os praceiros e as praceiras do mercado municipal de Carballo traen tódolos días o mellor da horta e do mar de Bergantiños, dereitiño para a túa mesa: o saboroso pan de Carballo, as patacas de Coristanco, o peixe capturado na noite anterior nos portos de Malpica, Laxe ou Razo, os mariscos do Esteiro do Anllóns, as carnes dos gandeiros da comarca, legumes, verduras e froitas de tempada…

Amais de alimentación, na praza de abastos de Carballo tamén podes mercar flores, roupa e calzado, tomar un café ou xantar na cafetaría, e desfrutar dos distintos eventos que acolle ó longo do ano, tanto na área de mercado coma na sala de usos múltiples do último andar.