Solicitude de autorización de cachelas e sardiñadas de San Xoán e San Pedro

Con motivo das Festas de San Xoán 2026, e coa finalidade de facilitar á veciñanza a celebración das cachelas e sardiñadas, con tanta tradición no noso concello, establécense as seguintes normas de obrigado cumprimento:

• Autorízase a colocación de barbacoas ou similares e a realización de cachelas durante as celebracións patronais do San Xoán 2026.
• Ao abeiro do establecido na Ordenanza de ocupación do dominio público local con terrazas de hostalaría, dispénsase aos establecementos do sector da prohibición xeral de realizar barbacoas ou similares na vía pública no período comprendido entre o 19 e o 29 de xuño.

Tanto as persoas coma os establecementos de hostalaría que desexen realizar as actividades previstas nos puntos 1 e 2 terán a obriga de realizar unha comunicación previa cubrindo a instancia específica, ben cubrindo o formulario inferior ou presencialmente, na planta baixa da casa do concello. As solicitudes non recibirán resposta.

O prazo para presentar comunicacións previas remata o 19 de xuño. O obxectivo do trámite é facilitar ás forzas de seguridade a localización das cachelas por se fose precisa a súa intervención.

NORMAS PARA A ELABORACIÓN DAS CACHELAS

1. As cachelas deberán situarse a unha distancia mínima de 12 metros de edificacións, árbores, vehículos, tendidos eléctricos, telefónicos ou calquera outro elemento que poida supoñer risco.
2. O diámetro máximo da zona de combustión será de 4 metros e a altura máxima da fogueira será de 2 metros.
3. Só se poderán empregar na combustión leña, pólas, toros de árbores e outros materiais de madeira limpa.
4. Queda prohibido queimar pneumáticos, plásticos, latas, botellas, materiais con PVC ou similares, así como botar aerosois, aceites, líquidos combustibles, substancias explosivas ou calquera outro material perigoso.
5. A persoa solicitante deberá manter a vixilancia da fogueira durante toda a actividade e asegurarse de que queda totalmente apagada ao rematar.
6. A persoa solicitante deberá acatar as normas ou instrucións que poidan ditar os axentes da Policía Local, Protección Civil ou o Corpo de Bombeiros.
7. En caso de emerxencia, estarán dispoñibles os seguintes teléfonos: Emerxencias 112, Bombeiros 981 758 057, Policía Local 981 701 722 e Protección Civil 981 704 048.

INFORMACIÓN SOBRE PROTECCIÓN DE DATOS

• Responsable do tratamento: Concello de Carballo, con enderezo na Praza do Concello, 15100 Carballo.
• Finalidade: tramitar a presente solicitude e xestionar, se procede, a autorización da actividade solicitada.
• Conservación: os datos conservaranse durante o tempo necesario para atender a solicitude e cumprir as obrigas legais derivadas da xestión administrativa.
• Lexitimación: o consentimento outorgado coa presentación da solicitude e, se procede, o cumprimento dunha misión realizada en interese público.
• Cesións: non se prevén cesións de datos, agás obriga legal.
• Dereitos: pode exercer os dereitos de acceso, rectificación, supresión, oposición, limitación do tratamento e portabilidade presentando a correspondente solicitude, acompañada dunha copia do DNI ou documento equivalente.

A persoa solicitante declara que os datos achegados son certos, que coñece e acepta as normas de seguridade aplicables e que se compromete a cumprir as instrucións da Policía Local, Protección Civil ou Bombeiros. Así mesmo, a presentación da solicitude implica que le e acepta as normas de seguridade e a información sobre protección de datos incluídas na solicitude.