Rutas polo patrimonio invisible de Carballo

As Xornadas Carballo na Memoria incorporan este ano unha das súas principais novidades: as Rutas polo patrimonio invisible de Carballo, dúas propostas guiadas polo historiador e dinamizador cultural Hadrián García que permitirán descubrir espazos, elementos e historias moi vinculados á evolución da vila, pero que non sempre están á vista ou son coñecidos pola cidadanía.

A primeira ruta celebrarase o xoves 17 de setembro, ás 21.00 horas, e consistirá nunha visita nocturna á casa do concello. O percorrido permitirá coñecer de preto dous elementos singulares do edificio consistorial: o reloxo da casa do concello, que foi instalado hai xusto 50 anos, e o arquivo municipal.

A segunda proposta terá lugar o martes 22 de setembro, ás 19.00 horas, con saída desde a Praza do Concello, e estará centrada en dous capítulos fundamentais da historia urbana de Carballo: a primeira traída de augas e as augas termais.

Con estas dúas actividades, Carballo na Memoria amplía este ano a súa maneira de achegarse ao pasado local. Non só a través de documentos, fotografías ou investigacións históricas, senón tamén percorrendo fisicamente espazos e infraestruturas que explican como se foi configurando o Carballo actual.

As rutas forman parte da programación das Xornadas Carballo na Memoria 2026, que este ano teñen como fío condutor os 190 anos da constitución do Concello de Carballo e que se desenvolverán do 3 ao 24 de setembro.

A participación nas rutas require inscrición previa no formulario inferior.

Importante!

• No caso de acudir con menores de idade deben seleccionarse 2 prazas.
• Se finalmente non podes asistir á ruta, envía mensaxe de cancelación a comunicacion@carballo.gal