As Andainas de Remocea: Ardaña

Arrincan as Andainas de Remocea, unha iniciativa da Concellaría de Mobilidade coa que pretendemos fomentar o exercicio físico e poñer en valor a riqueza das nosas parroquias a través do coñecemento dos seus valores culturais e ambientais nunha serie de rutas guiadas por zonas rurais. Esta semana percorreremos Ardaña. En plena Depresión Meridiana, a parroquia de Ardaña comparte coas de Rus e Erbecedo (Coristanco) unha das agra máis fértiles da bisbarra, berce da pataca Fina de Carballo e tamén da Pataca de Coristanco. A carón de escondidas augas sulfurosas atópase o Pazo de Gontade, o máis antigo do concello.

O punto de encontro será o centro social de Ardaña.

As Andainas de Remocea están dirixidasa a maiores de 60 anos e realizaranse os domingos pola mañá. Todos os itinerarios serán circulares, de 2 a 3 horas de duración e dificultade baixa, e as persoas participantes terán que achegarse ata o punto de encontro polos seus medios. Para participar só se precisa unha forma física normal, roupa e calzado cómodos, unha mochila con algo de comida e auga, e ganas de coñecer o noso territorio!

As Andainas de Remocea teñen como finalidade promover o coñecemento dos valores culturais e ambientais das parroquias do concello de Carballo a través da actividade deportiva, ademais de facilitar ás persoas participantes un achegamento especial á etnografía, a arquitectura e a ecoloxía, utilizando de xeito prioritario as antigas corredoiras antigas e fuxindo do asfalto. As persoas participantes irán acompañadas por un guía profesional da empresa Vía Inqueda.