Agrupacións

Banda Municipal de Música de Carballo

A Banda Municipal de Música de Carballo iniciou a súa andaina no ano 1984, dirixida por Vicente Pérez Planells.

Dous anos despois cedería o testemuño a José Barros Sada, que dirixíu esta agrupación durante 10 anos ensaiando en distintas instalacións do concello, entre elas o CEIP Bergantiños, onde se realizou un programa concurso para TVE en Galicia que se chamaba Galicia de escola a escola, do que existe unha gravación en vídeo.

No ano 1996 e ata a súa xubilación, vinte anos despois, volve facerse cargo da dirección da banda Vicente Pérez Planells.

Desde o 2017 ata o 2021 a agrupación foi dirixida por Rafael Espido Lata, profesor de clarinete do CMUS Carballo. Parte desta etapa coincidiu cun dos peores momentos das nosas vidas, a pandemia da COVID-19, na que non foi doado poder realizar os ensaios nin concertos con normalidade, pero aínda así se mantivo a ilusión incluso chegando a gravar o tema Resistiré de maneira virtual.

En setembro do 2021 colle o relevo con moita ilusión e novos proxectos o carballés Javier Bardanca Castro, profesor de trompeta do CMUS e actual director do centro.

Desde a súa creación, a Banda Municipal de Música de Carballo realizou actuacións por toda Galicia e gravacións para a Radio Galega, ademais de editar no ano 1999 un disco con temas e estilos moi diversos. No ano 2000 gañou o concurso de Xoves Intérpretes da Xunta de Galicia cun concerto que se recolle nun disco publicado pola propia Xunta. Tamén gravou un disco no programa Outra+Outra 2006 da fundación Paideia e co patrocinio da Deputación da Coruña.

Nesta banda formáronse moitos dos músicos que hoxe en día forman parte profesionalmente das grandes orquestras de Galicia, conservatorios e centros educativos.

Na actualidade, a agrupación está composta por cerca duns cincuenta intérpretes, entre o alumnado do CMUS Profesional de Carballo e colaboradores amigos da banda.

Big Band

A Big Band do Conservatorio de Carballo é un dos froitos logrados por este centro xa dende os seus inicios no ano 1993. Cun estilo musical propio dos anos corenta e cincuenta, o seu primeiro director foi Marcial Figueroa, profesor de corda e vento metal. Sobre o ano 2005 collía a batuta Miguel Suárez, docente no Cmus de Carballo na especialidade de guitarra. Continuou coa mesma liña de traballo pero cun repertorio propio da época dos sesenta e setenta, cos seus propios arranxos e dándolle una personalidade propia á banda.

Dende o ano 2015 esta formación está dirixida por Javier Bardanca, que nos achega un repertorio máis fresco e os alegres ritmos da música latina con temas máis actuiais arranxados para esta formación. A xuventude da Big Band non é obstáculo para que sexa unha formación das que máis gozan os amantes da música de Carballo e de toda a Costa da Morte nos seus habituais concertos no Pazo da Cultura, no pregón das festas de San Xoán ou en colaboracións e intercambios con outros concellos.

A Big Band xa ten gravados dous cedés, participou no programa Luar da TVG, onde presentou un dos seus discos, e tamén en distintos certames e concursos musicais de toda Galicia. Nestes últimos concertos contou con colaboracións de cantantes moi recoñecidos no mundo das orquestras populares de Galicia, como Sito Sedes, Noli González e Alejandra Pais (Los Satélites), Maria Jesús Fraga e Martín Carrión (Trébol); Jenifer Cambón, ex-alumna do Cmus e finalista dos recantos de Luar, e tamén alumnos que están a cursar os seus estudos no Cmus como Martín e Aroa Ordóñez e Samuel Quiroga.

O Concello de Carballo vén facendo un importante esforzo para ofrecer un recurso tan importante coma o CMUS á infancia e ás persoas adultas que teñen interese en completar a súa educación e formación musical de calidade, consolidando e ampliando a oferta do conservatorio, que hoxe é unha referencia en toda a comarca de Bergantiños e Costa da Morte. Este traballo estase a ver recompensado cos resultados que están obtendo músicos formados nesta institución, moitos deles integrados en agrupacións musicais de diferentes estilos que cada vez máis enriquecen a vida cultural da nosa contorna.

Banda infantil

A Banda infantil do Cmus Carballo é un proxecto deste centro que nace no ano 2017 baixo a dirección do profesor de clarinete Rafael Espido Lata, coa intención de motivar ao alumnado do grao elemental de vento e percusión a desfrutar da música tocando nunha agrupación e así enriquecer a súa formación musical.

Desde o ano 2023, esta agrupación esta dirixida pola profesora de Frauta Isaura Rey Castro e conta cuns 25 intérpretes do grao elemental do CMUS. Xa participou en varios concertos neste centro, ademais de actuar no centro social de Ardaña no ano 2024 dentro do ciclo CMUS en Ruta.

Orquestra infantil

A Orquestra Infantil do Conservatorio de Carballo nace en setembro do ano 2022 coa intención de introducir ao alumnado de violín, viola e violoncello na práctica conxunta antes de pasar a formar parte da Orquestra de Grao Profesional.

Está dirixida dende o seu nacemento pola profesora de violoncello Emma Urango. Dende aquela ten realizado diversas actividades, coma o concerto na residencia de maiores de Carballo e os recitais de Nadal e fin de curso.