O Concello de Carballo aprobou na sesión da Xunta de Goberno Local do 6 de abril de 2026 un conxunto de liñas de subvención destinadas a reforzar o tecido asociativo, cultural, económico e educativo do municipio, cun investimento global de 262.000 euros.
Apoio ao deporte local
No ámbito deportivo aprobouse a concesión dunha subvención nominativa ao Bergantiños F.C. cunha dotación máximas de 70.000 euros.
Esta achega municipal, que representa preto do 15% do orzamento da actividade do club, está destinada a financiar a participación en competicións deportivas federadas durante o ano 2026, poñendo especial atención no interese social e no volume de categorías de base que manexa a entidade.
Impulso á actividade cultural
A Xunta de Goberno Local aprobou tamén as bases da convocatoria de subvencións ás asociacións culturais para o desenvolvemento dos seus programas anuais de actividades. O obxectivo é potenciar o papel destas entidades no desenvolvemento cultural do municipio e facilitar o acceso da cidadanía á programación cultural.
Esta liña contará cunha dotación total de 47.000 euros.
Promoción económica e apoio ao comercio local
No ámbito económico aprobáronse as bases da convocatoria de subvencións dirixidas a asociacións de empresarios e comerciantes para actividades de promoción económica durante o ano 2026.
O Concello destinará a esta liña un total de 75.000 euros, orientados a accións de dinamización comercial, formación e promoción do tecido empresarial local. Como norma xeral, estas axudas poderán cubrir ata o 80% do orzamento dos programas presentados, cun máximo de 30.000 euros por entidade.
Axudas ao estudo
Co obxectivo de garantir a igualdade no exercicio do dereito á educación, o Concello aprobou tamén a convocatoria de axudas para o alumnado do 2º ciclo de Educación Infantil e para estudantes do Conservatorio Profesional de Música de Carballo para o curso 2025-2026.
Para estas axudas reservouse unha partida total de 70.000 euros: 64.000 euros destinados especificamente a Educación Infantil e 6.000 euros para os estudos de grao elemental ou profesional no CMUS.
Estas axudas buscan aliviar a carga económica das familias con menos recursos ante gastos de escolarización que non contan con apoio doutras administracións.
Compromiso co desenvolvemento local
Con este paquete de medidas, o Concello de Carballo reafirma o seu compromiso co desenvolvemento social, cultural e económico do municipio, apoiando ás entidades e colectivos que contribúen a dinamizar a vida local e mellorar a calidade de vida da veciñanza.
As distintas convocatorias foron publicadas este venres 10 de abril no Boletín Oficial da Provincia (BOP), pero é preciso agardar á publicación a través da Base de datos nacional de subvencións (BDNS) para que abra o prazo de solicitude.