O alcalde de Carballo, Daniel Pérez, acompañou á asociación Aspaber no arranque oficial dos actos do seu 50 aniversario. Nun encontro cargado de emotividade celebrado na sede da entidade, usuarios/as, traballadores/as e representantes municipais deron o pistoletazo de saída a un ano que servirá para poñer en valor cinco décadas de traxectoria e esforzo pola plena inclusión.
O alcalde e concelleiro de Obras, Luis Lamas, participaron na presentación da nova imaxe corporativa conmemorativa baixo o lema: Aspaber 50 anos: traxectoria, compromiso e futuro.
Durante o acto, Daniel Pérez quixo subliñar a importancia desta efeméride e o papel fundamental da asociación no noso concello: “Nestes 50 anos, Aspaber demostrou que cun compromiso firme se poden derrubar barreiras. Para Carballo é un orgullo contar cunha entidade que é referente en inclusión e que soubo medrar da man da nosa comunidade, transformando a vida de moitas persoas e axudándonos a ser un concello máis xusto.”
Unha programación para toda a veciñanza
Durante o acto, a dirección de Aspaber debullou a folla de ruta dunha celebración que implicará a toda a vila con diversas actividades:
- Maio: inauguración da ampliación do centro de día
- Xullo: protagonismo na Praza dos Libros, organizada pola Concellaría de Bibliotecas
- Setembro: exposición de infografías históricas na rúa Colón
- Outono: xornadas técnicas sobre a sostibilidade das asociacións no ámbito rural
- Novembro: gran Gala do 50 aniversario no Pazo da Cultura
Ademais dos eventos, a entidade anunciou unha renovación da súa imaxe e unha intervención artística en forma de mural que decorará a fachada das súas instalacións, integrando aínda máis o centro na paisaxe urbana e social de Carballo.
Con este inicio de aniversario, Carballo e Aspaber reafirman un vínculo histórico que seguirá medrando con novos proxectos e desafíos de futuro.
