Os bombeiros voluntarios

Foron un grupo inicial de trece persoas que se constituíu na década dos setenta para velar pola seguridade cidadá en Carballo.

O colectivo formouse despois dunha serie de incendios que afectaron a Carballo nos anos 1975 e 1979. Segundo lembrou un dos seus integrantes, Ricardo Vilas, sempre aparecía o mesmo grupo de persoas para apagar o lume, polo que trece delas decidiron crear un grupo de emerxencias. Ademais de combater incendios, tamén atendían accidentes de tráfico e realizaban tarefas de salvamento nas praias, empregando só “unha corda e un flotador” para tentar salvar vidas.

As súas actuacións non se limitaban a Carballo, senón que tamén se estendían a outros concellos da comarca, como A Laracha ou Malpica, e mesmo a lugares máis afastados.

Foron recoñecidos no ano 1993 como Bergantiñán do ano e incorporáronse a Protección Civil no ano seguinte.

No ano 2012 o Concello de Carballo tivo un recoñecemento á súa traxectoria nomeando unha praza co seu nome no espazo do Fórum Carballo.