A web oficial do concello de Carballo
A web oficial do concello de Carballo
Razo é desas praias que non se esquecen porque te recarga con toda a enerxía do mar aberto ao Atlántico.
De douradas areas e solpores de intensas cores que morren detrás das illas Sisargas, este amplo areal é, ademais, un importante espazo protexido pola súa riqueza natural e paisaxística.
Baldaio é praia, lagoa e marisma. Un areal no que respirar fondo e acougar, en contacto coa natureza. É, de feito, un dos humidais máis importantes de Galicia e zona de especial protección ambiental.
O mar adéntrase na terra e mestúrase coas augas doces que chegan dos ríos da zona. Créase así un espazo, a marisma, moito máis fértil que calquera terreo de labranza.
Ao norte de Baldaio atoparás a praia da Pedra do Sal, de fácil acceso e tamén incluída en Rede Natura. Penedos graníticos golpeados unha e outra vez polas ondas do mar compoñen a paisaxe característica deste areal.
Por un estreito carreiro á beira do mar, no tramo de litoral que conduce dende a Pedra do Sal até Caión, atoparemos unha sucesión de fermosas calas que aparecen coa marea baixa.
