A Concellaría de Planificación Urbana, Mobilidade e Policía establece a suspensión da limitación do aparcamento en Zona Azul entre os días 19 e 29 de xuño, ámbolos dous incluídos, coincidindo coa Semana Grande do San Xoán. Durante estes once días os condutores e condutoras poderán estacionar os seus vehículos libremente nas prazas nas que habitualmente está limitado a 90 minutos o tempo máximo de estacionamento.
Tal como establece a ordenanza municipal sobre circulación e utilización das vías públicas no seu artigo 18, “a autoridade municipal, en casos de emerxencia ou ben pola celebración de actos deportivos, culturais ou de calquera outra natureza, susceptibles de producir grandes concentracións de persoas ou vehículos, poderá modificar temporalmente a ordenación do tráfico existente e adoptar, no seu caso, todas as medidas preventivas necesarias para garantir a seguridade das persoas e vehículos e unha maior fluidez na circulación”.
Plan de tráfico
Dentro das medidas propostas pola Policía Local de Carballo tamén figura, como todos os anos, o establecemento de vías de acceso alternativas para as persoas residentes e/ou usuarias de garaxes nas rúas que permanecerán pechadas durante as festas.
O emprazamento das atraccións no Rego da Balsa, por segundo ano consecutivo, tamén implicará cambios. Deste xeito, o San Martiño poderá utilizarse para estacionar, aínda que os aparcadoiros recomendados pola Concellaría de Mobilidade para estas datas son o situado a carón do Centro Comercial Bergantiños e os da contorna do Pazo da Cultura.
Na zona do Rego da Balsa, o servizo de limpeza viaria estivo traballando nos últimos días na posta a punto dos aparcadoiros para que poidan albergar as atraccións e as barracas das festas, que empezarán a instalarse o luns 16. Nese mesmo ámbito desenvolverase tamén a cachela popular e algunhas das verbenas, polo que están previstos cortes de tráfico na prolongación da rúa Bos Aires (desde o cruce con Ecuador) e na rúa Perú coincidindo coas grandes actuacións programadas nese ámbito os días 21, 22 e 23.
Tanto na rúa Perú (desde a rotonda da Ponte da Pedra ata a rotonda da rúa Poñente) coma na Vázquez de Parga (desde o cruce con Emilia Pardo Bazán) realizaranse cortes nas horas de maior afluencia. Así mesmo, para facilitar o ocio nocturno, como xa vén sendo habitual todos os anos, poderá pecharse a rúa Estrela. En canto á contorna da Praza do Concello, que seguirá sendo o centro da festa, realizaranse os cortes habituais coincidindo coas procesións e as grandes actuacións nocturnas.
A Concellería de Mobilidade agradece a colaboración da cidadanía para facer posible a conciliación dos distintos usos que teñen as rúas máis céntricas durante a celebración das festas patronais.
