O Concello de Carballo continúa a súa decidida aposta pola cultura visual baixo o selo A través da lente. Tras a entrega de galardóns da 28.ª edición do Certame de Fotografía Xosé Manuel Eirís, a programación esténdese durante o mes de maio con dúas citas que prometen achegar a arte da imaxe a toda a cidadanía: unha viaxe ao pasado co documental Cardoña e unha lección maxistral sobre a ollada contemporánea.
Mércores 13: O legado de Cardoña no Auditorio
A primeira cita terá lugar este mércores, 13 de maio, ás 20:00 horas, no Auditorio do Pazo da Cultura. Proxectarase a curtametraxe documental Cardoña, fotos a 7 pesetas, dirixida por Carlos Lorenzo. A obra rescata a memoria de José Gestal García, un fotógrafo popular que documentou a vida nas feiras e parroquias de Carballo e Carral no século XX. Tras a proxección, o director participará nun coloquio para reflexionar sobre a importancia de conservar os arquivos fotográficos familiares como patrimonio histórico.
Xoves 21: Visita guiada con Ángel Cordero
Como complemento á exposición do Certame Fotográfico Xosé Manuel Eirís, o xoves 21 de maio realizaremos unha visita guiada de mans de Ángel Cordero, recoñecido experto e membro do xurado desta edición.
Nesta visita, os asistentes poderán afondar na linguaxe visual das pezas gañadoras, analizando aspectos como o uso da luz na Gasolinera de Xavier Ferrer ou a narrativa social de La ansiedad de Dmytro Yaroshevskyi. Trátase dunha oportunidade única para aprender a “ler” a fotografía dende o punto de vista dun profesional, descubrindo por que estas imaxes destacan entre as 117 presentadas este ano.
O compromiso de Carballo coa imaxe
Con estas actividades, a Concellaría de Cultura busca que o Pazo da Cultura sexa un espazo de aprendizaxe e reflexión. “Queremos pasar da simple observación á comprensión profunda da imaxe, unindo a nostalxia de Cardoña coa vangarda do Certame Eirís”, desta a concelleira, Maruxa Suárez.