O proxecto “Pesca Saúde” chega ao centro de saúde de Carballo

O proxecto de cooperación Pesca Saúde recala este martes, 28 de abril, no centro de saúde de Carballo coa campaña Alimentos de mar, alimentos de vida. Esta iniciativa busca concienciar á poboación sobre a importancia de incluír produtos pesqueiros das lonxas galegas na dieta diaria para acadar unha nutrición sa, equilibrada e sostible.

Entre as 11:00 e as 13:00 horas, o acceso ao centro de saúde contará cunha FoodBike promocional onde se levarán a cabo diversas accións de dinamización:

• Información e material: O persoal técnico do proxecto entregará material divulgativo, incluíndo un receitario, información sobre propiedades nutricionais e vales de compra.

• Presentación institucional: Ás 11:30 horas terá lugar a benvida oficial coa participación de representantes do GALP Costa da Morte, a xerencia do centro de saúde e autoridades do Concello de Carballo.

• Degustación: A partir das 12:00 horas, as persoas asistentes poderán desfrutar dunha degustación de produto pesqueiro elaborado por profesionais da restauración do territorio, poñendo en valor a calidade gastronómica dos produtos de proximidade.

Pesca Saúde é un proxecto promovido polos Grupos de Acción Local do Sector Pesqueiro (GALP) da Consellería do Mar, financiado polo Fondo Europeo Marítimo e de Pesca e conta coa colaboración da Consellería de Sanidade.

O obxectivo principal é mellorar a calidade de vida e o benestar da cidadanía a través de hábitos alimenticios saudables, destacando os beneficios que o consumo de peixe aporta na prevención de enfermidades e no coidado integral da saúde.