A Xunta de Goberno Local do Concello de Carballo, presidida polo alcalde, Daniel Pérez López, mantivo esta mañá unha sesión ordinaria na que se adoptaron acordos relacionados co dinamismo económico, o urbanismo e o deporte no municipio.
O goberno local reafirmou o seu compromiso co crecemento industrial de Carballo mediante a concesión dunha licenza de obra para a construción dunha nova nave industrial na rúa do Titanio, no polígono de Bértoa. O proxecto, promovido por Ventanorte S.L., contará cun investimento de máis de 250.000 euros e estará destinado a un taller de carpintería metálica, consolidando o polígono como un motor de emprego.
Paralelamente, aprobouse a renovación do convenio coa Cámara de Comercio, Industria, Servizos e Navegación da Coruña para o 2026. O Concello achegará 20.000 euros para o funcionamento do Viveiro de Empresas, un espazo clave que facilita asesoramento e formación gratuíta para novos emprendedores.
Novas licenzas urbanísticas
Ademais da actividade industrial, a Xunta de Goberno tramitou diversas autorizacións que reflicten o dinamismo de diferentes sectores no municipio:
- Sector turístico: o goberno local aprobou a licenza para a edificación de tres novos apartamentos turísticos na rúa Pacífico, en Razo. O complexo terá unha capacidade máxima de 15 prazas (5 por apartamento), e contribuirá a reforzar a oferta de aloxamento no litoral.
- Sector agrogandeiro: en Rus autorizouse a ampliación dunha explotación de vacún de leite cun novo almacén agrícola de case 600 m², xunto coa legalización dun espazo xa existente.
- Ámbito residencial: concedida licenza para a reforma e legalización dunha vivenda unifamiliar de planta baixa e baixo cuberta no lugar do Outeiro, cun orzamento de execución próximo aos 100.000 euros.
A Xunta de Goberno Local aprobou o prezo público para a XIV Carreira Popular “10K Carballo 2026”, que se celebrará o domingo 7 de xuño. Para fomentar a participación, mantense a gratuidade para as categorías de menores e un prezo público de 5 euros para a categoría absoluta.
Finalmente, o goberno local acordou desestimar unha reclamación patrimonial por danos materiais relacionados con traballos de limpeza forestal, ao considerar que a actuación institucional se realizou conforme á normativa vixente e no marco das obrigas legais en materia de prevención de incendios. Neste sentido, lémbrase a obriga dos propietarios de manter as fincas limpas de biomasa antes do 31 de maio de cada ano para evitar incendios e posibles execucións subsidiarias por parte das Administracións competentes.