A web oficial do concello de Carballo

elos-chapa

O programa

Elos é un programa de voluntariado lingüístico para facilitar o contacto entre persoas que desexan aprender e practicar o galego e persoas que queiran colaborar con elas.

A partir dos datos que se facilitan na inscrición, compóñense parellas lingüísticas tendo en conta a dispoñibilidade e os intereses e cítanse para o seu primeiro encontro, que se realiza coa mediación dunha persoa coordinadora do programa. Os datos de contacto só se facilitan unha vez que as dúas persoas aceptan a parella proposta.

O funcionamento posterior é autónomo, co compromiso de conversar en galego, cando menos, unha hora á semana. Os encontros poden ser virtuais ou presenciais.

A coordinación do programa mantén o seguimento para resolver dúbidas ou buscar novos emparellamentos cando algunha das partes deixa o programa temporal ou definitivamente. Tamén ofrece actividades complementarias e gratuítas coas que coñecer máis sobre o noso contexto cultural.

Quen pode participar?

Calquera persoa, de aquí ou de fóra, que queira aprender a falar en galego. Calquera persoa que saiba falar galego, coa vontade de axudar outras persoas a mellorar a súa competencia na nosa lingua.

En que me vai axudar?

Para entender mellor calquera información.
Para comezar a falalo.
Para atopar con quen practicar.
Para coñecer máis e mellor a xente e a cultura deste lugar.

E de que me serve?

Podes facer novas amizades, coñecer outras realidades e culturas e quizais intercambiar a túa lingua con outra que desexes aprender.

Quen pode participar?
  • Calquera persoa, de aquí ou de fóra, que queira aprender a falar en galego e dispoña dunha hora á semana para dedicarlle a esta aprendizaxe.
  • Calquera persoa que saiba falar galego, teña unha hora dispoñible á semana e a vontade de axudar outras persoas a aprender ou mellorar a súa competencia na nosa lingua.
  • Para entender mellor calquera información.
  • Para comezar a falalo.
  • Para atopar con quen practicar.
  • Para coñecer máis e mellor a xente e a cultura deste lugar.
  • Para entender mellor calquera información.
Formulario de inscrición

Consellos para ser
unha parella lingüística feliz

Participar en Elos pode ser un bo xeito de empezar unha amizade pero, cando menos, debe ser unha fórmula agradable de transmitir e adquirir a lingua. Os intereses comúns farán máis fluídos os encontros, facilitarán a conversa e converterán en máis significativa calquera aprendizaxe.

Con estes consellos queremos axudar a que sexa máis fácil e proveitosa esa transmisión e suxerir tamén algunhas opcións para enriquecela.

  • Aínda que ás veces non o pareza, recorda que estás a falar con alguén que non domina completamente o teu idioma; se non fose así, probablemente non estariades formando esta feliz parella.
  • Acórdate de vocalizar ben e ten conta de non falar demasiado rápido (necesitamos tempo para procesar a información, máis aínda se é nunha lingua que estamos a aprender). Tampouco é preciso que fagas o típico de falar tan amodo que outra persoa acabe adormecendo. Quen está a aprender probablemente fale máis amodo, claro, está a aprender!
  • O noso idioma, coma todos, ten moitas variantes e sinónimos. Isto pode dar moito xogo nas conversas pero tamén llo pode poñer difícil para quen se achega por primeira vez. Facilítalle as cousas a quen ten a vontade de aprender.
  • Non fagas tampouco un uso desleixado da lingua. A sinxeleza non quita a corrección. É moi habitual usar castelanismos nas formas verbais, na colocación dos pronomes… E son cousas especialmente difíciles, que só se interiorizan escoitando un bo modelo (que, neste caso, vas ser ti) Por se tes dúbidas, lembra que hai ferramentas en liña e de acceso gratuíto onde consultar.
  • A linguaxe corporal axuda a comunicar e iso importa máis aínda cando non dominas ben a lingua da persoa interlocutora. Transmite con todo o corpo e, sobre todo, mira directamente a outra persoa cando esteas a falar.
  • Unha conversa vai, precisamente, de falaren todas as persoas que participan nela. Se tes moita leria, deixa de chupar micro e comparte. A práctica inclúe tanto escoitar como falar.
  • Practica a escoita activa. Atende ao que che están dicindo e que se note. Asinte coa cabeza, cos ollos, coa voz, pregunta, interésate…
  • A túa colaboración tamén pode ser útil para mellorar a integración no noso contexto. Facilítalle información ou o camiño para acceder a ela e teredes aínda máis temas para conversar.
  • Adquirir unha nova lingua ten moito de atreverse e non ter vergoña, de falar aínda que non sempre deamos coas palabra máis adecuadas ou atinemos coas regras da gramática. Avanzamos a forza de cometer erros.
  • Procura ampliar todo o posible o contacto coa lingua e aproveita as ocasións cotiás para usar, ou cando menos escoitar, o galego en calquera variante e rexistro: pídelles ás persoas coas que te relacionas que che falen na nosa lingua.
  • As TIC ou a oferta cultural son moi boas vías para aumentar o contacto coa lingua: podes escoitar música, ver películas, informarte, ler boas historias, ver titoriais, acudir ao teatro e a outros eventos culturais… Para animarte a explorar, velaquí algunhas suxestións:
    Listas de música de Orgullo Galego
    Youtubeiras
    Cine galego
    Biblioteca Virtual Galega
    Medios de comunicación en galego
  • Non todo é escoitar, tamén hai que falar. Tes moito que contarlle á túa parella lingüística e seguro que lle vai interesar. A interacción con ela vai ir dándoche maior soltura nun contexto de confianza.
  • Aínda que che falten palabras ou te decates dalgún erro, tira para diante e remata o que queres dicir. A comunicación xestual tamén axuda a que te fagas entender, non te preocupes. Ver que é posible a comunicación dá seguridade.
  • Se xa superaches as primeiras etapas e consegues entender e facerte entender, toca agora ir mellorando. Pode ser útil preguntar ou buscar cada día a forma correcta de dicir unha ou dúas cousas e anotalas nun caderno para botarlle un ollo de cando en vez e que se vaian fixando.
  • Existe material de consulta ou apoio accesible na rede. Non se trata de andares todo o día co dicionario ás voltas, pero telo localizado para cando teñas tempo non sobra. Suxerímosche que o poñas nos favoritos porque atoparás rapidamente os significados das palabras, as principais expresións en que se usan, e tamén a súa pronuncia ou, mesmo, as conxugacións dos verbos:
    Dicionario da Real Academia Galega