PROGRAMACIÓN CULTURAL
Luns 3 de novembro do 2008
Cando os veciños e veciñas de Carballo aínda están coa resaca que deixou a última fin de semana do Festival Internacional Outono de Teatro (FIOT), ao escenario do Pazo da Cultura xa chega a oferta do 'Novembro con música 2008'. Un total de 23 agrupacións serán as protagonistas de 12 concertos para todos os públicos, con actuacións para os máis pequenos dentro da proposta 'En familia', e coa presenza de formacións como o Orfeón Caixa Galicia ou a Orquestra de Cámara da Sinfónica de Galicia. Os actos son todas as fins de semana entre o 7 de novembro e o 4 de decembro.
XVII EDICIÓN DO FIOT
Xoves 30 de outubro do 2008
O Festival Internacional Outono de Teatro (FIOT) chega á súa fin. Toda vez que a pasada fin de semana a traxedia e a intensidade dramática foron as protagonistas nas táboas do Pazo da Cultura, e despois de que Yllana puxera un aclamado contrapunto humorístico colgando o cartel de 'non hai billetes', chega o peche do FIOT. O Premio do Público do ano 2007, que recaeu no Centro Dramático Galego (CDG), e unha estrea en Galicia da man do famoso clown belga Joseph Collard, marcarán o remate da edición máis brillante e internacional do Festival.
CARBALLO SAUDABLE
Mércores 29 de outubro do 2008
Arredor de 120 veciñas de Carballo teñen participado ao longo do último mes e medio nos obradoiros do Curso de Hábitos Saudables incluído nas Xornadas de Saúde para Mulleres que se están desenvolvendo no Concello. Este cursiño -que rematou esta semana- consistiu na celebración de catro sesións, tanto na capital municipal como nas parroquias de Razo, Sofán -na imaxe as veciñas desta parroquia co seu diploma- e Cances, nas que se abordaron temas como a alimentación saudable, a saúde no fogar, a saúde mental ou a saúde sexual e afectiva. Dende a Concellaría de Igualdade e Sanidade que dirixe Lourdes Rey amosan a súa satisfacción polo elevado índice de participación.
DOROTEA BÁRCENA RECOLLE O VENRES 31 O XOGRAR DE OUTONO
Mércores 29 de outubro do 2008
O Festival Internacional Outono de Teatro retoma o mércores 29 de outubro os espectáculos de sala cunha compañía que xa ten estado en Carballo ata sete veces coas súas representacións. O peculiar e exitoso humor de Yllana volta cunha nova aposta, 'Brokers', un retrato do salvaxe mundo das finanzas. Catro tiburóns dos negocios, fanáticos da moda de marca, das últimas tecnoloxias e do culto ao corpo, perseguen o éxito na era do furor consumista, nunha carreira polo triunfo que descobre os seus medos máis ocultos. A estas alturas, as entradas xa están esgotadas e os afortunados que teñan un ticket teñen unha cita ás 21.00 horas no Pazo da Cultura.
SESIÓN PLENARIA
Martes 28 de outubro do 2008
A corporación carballesa celebrou unha sesión plenaria ordinaria o 27 de outubro na que se aprobou por unanimidade o proxecto para emprender a dotación dun sistema de abastecemento de augas para o val de Baldaio. Este proxecto afecta ás parroquias de Lema, Rebordelos, Noicela e Vilela, e tamén ás larachesas de Lendo e Lemaio. Trátase dunha actuación de 1.740.000 euros que na súa meirande parte se desenvolverá en terras carballesas. A administración local aporta un total de 339.000 euros para o desenvolvemento do proxecto, dos que arredor de 100.000 se investirán ao longo de 2009.
OUTONO DE TEATRO
Luns 27 de outubro do 2008
O salón de actos do Pazo da Cultura presidiu esta fin de semana un dos momentos máis emotivos do Festival Internacional Outono de Teatro. Os integrantes do grupo Ártabro reuníronse 20 anos despois para lembrar o nacemento desta compañía que deveniu no xermolo do que hoxe é o FIOT. Chegados dende Santiago, Monforte ou incluso Canarias -ademais dos que seguen residindo en Carballo-, os membros desta compañía de teatreiros que marcou un fito coa obra 'Non lle busques tres pernas ao alcalde', viviron unha xornada emocionante, de volta atrás e, sobre todo, de lembrar "que o pasamos moi ben", en verbas de José María de la Viña, daquela director do espectáculo.
XUNTA DE GOBERNO LOCAL
Luns 27 de outubro do 2008
Despois de que o pasado 5 de setembro o Proxecto Fórum Carballo recibira o seu visto bo definitivo no Ministerio de Administración Públicas en Madrid, agora o Concello continúa cos trámites necesarios para desenvolver esta iniciativa de dinamización socioeconómica e sostible que permitirá rematar o complexo da Casa dos Oficios no barrio da Milagrosa e impulsar outras actuacións para revitalizar este barrio. Así, a Xunta de Goberno Local do 27 de outubro aprobou o expediente de contratación para o 'Deseño do centro de Dinamización socioeconómica sostible de Carballo para o Proxecto Fórum', cofinanciado conforme ao Fondo Europeo de Desarrollo Regional (Feder).
'AGARIMOS PARA TODA A VIDA'
Venres 24 de outubro do 2008
O Concello e a 'Asociación amigos de los perros de Carballo' veñen de asinar un convenio polo que desenvolverán nos próximos meses unha campaña de sensibilización -que terá lugar principalmente nos medios de comunicación, nos centros especializados, nas feiras e nos colexios do municipio- co obxectivo de concienciar á cidadanía na responsabilidade de ter unha mascota e tentar animar aos veciños e veciñas a que adopten animais que teñen sido abandonados. A 'Asociación amigos de los perros' será a encargada de desenvolver as tarefas de sensibilización, mentres que o Concello carballés financia estas actuacións con arredor de 3.000 euros.
SESIÓN PLENARIA ORDINARIA
Venres 24 de outubro do 2008
A corporación de Carballo celebra un pleno ordinario o 27 de outubro no que un dos principais asuntos da orde do día é a aprobación do proxecto de abastecemento de auga para o val de Baldaio, que afecta ás parroquias de Lema, Rebordelos, Noicela e Vilela, e tamén ás larachesas de Lendo e Lemaio. Trátase dunha actuación de 1.740.000 euros e que na súa meirande parte se desenvolverá en terras carballesas. A administración local aporta un total de 339.000 euros para o desenvolvemento do proxecto, dos que arredor de 100.000 se investirán ao longo de 2009.
TRÁFICO
Venres 24 de outubro do 2008
Despois de que os operarios municipais pintaran no mes de setembro 129 novas prazas de estacionamento en zona azul nas vías máis céntricas da capital municipal, ao longo desta semana xa rematou a implantación da sinalización vertical nestas zonas, polo que a partir de agora estas prazas están xa completamente operativas e os infractores poden ser obxecto de sancións. Esta nova regulación afecta ás rúas Igrexa, San Xoán, Vázquez de Parga, Pontevedra, Estrela, Ourense, Ponte, Avenida de Fisterra e Río Anllóns.
FIOT
Xoves 23 de outubro do 2008
O Festival Internacional Outono de Teatro (FIOT) 2008 decidiu outorgar o galardón do Xograr de Outono desta edición á polifacética directora, autora e actriz Dorotea Bárcena. Trátase dunha das pioneiras do teatro galego, implicada activamente no nacemento do teatro en Galicia a través de diferentes facetas profesionais. A decisión da concesión deste galardón foi adoptada pola Asociación Cultural Telón e Aparte xunto cos anteriores Xograres do Outono, Celso Parada, Artur Trillo, Vítor Mosqueira e Quico Cadaval, que elexiron á nova premiada pola súa rica traxectoria profesional e polo seu importante papel no desenvolvemento do teatro en Galicia.
OUTONO DE TEATRO
Xoves 23 de outubro do 2008
Despois de que a pasada fin de semana o público enchera por completo as gradas do Pazo da Cultura e respondera con salvas de aplausos ás propostas de Teatro Meridional e Lagarta Lagarta, as próximas funcións de sala pertencen ao teatro internacional. As compañías Teatro delle Ariette, chegada dende Italia, e João Garcia Miguel, dende Portugal, fan que o Festival Internacional Outono de Teatro (FIOT) acade a súa faciana máis cosmopolita. 'Teatro da mangiare?' e 'Burguer ® King Lear' unen dúas propostas completamente diferentes e orixinais.
.jpg)
