.jpg)
XA SON MÁIS DE 200 AS PERSOAS COLABORADORAS
Capturadas 3.829 raíñas no primeiro mes da campaña anual de trampeo da avespa velutina
O Concello de Sant Cugat del Vallès interésase pola iniciativa para importar o sistema de Carballo, que xa é o modelo de moitos concellos galegos
Venres 9 de abril do 2021
.png "Todas as trampas están localizadas no mapa para facilitar o seu control")
Todas as trampas están localizadas no mapa para facilitar o seu control
No primeiro mes da campaña anual de trampeo da avespa velutina impulsada polo Concello de Carballo foron capturadas 3.829 raíñas, case 1.000 máis que o ano pasado, o que reflicte que esta especie invasora segue a ser un problema de grande magnitude.
A campaña, que se prolongará ata finais de maio, conta xa con 201 colaboradores/as, en boa parte apicultores/as, repartidos/as polas 18 parroquias, nas que temos colocadas 1.272 trampas. En todas as parroquias se produciron capturas de raíñas, aínda que nunhas máis ca noutras. Rus volve a figurar á cabeza, coma nos últimos anos. A modo de exemplo, nas 6 trampas colocadas por un colaborador do lugar da Canosa caeron 199 avespas.
Estamos nun momento clave para a loita contra a praga de velutina, xa que cantas máis raíñas consigamos capturar agora menos niños aparecerán máis adiante, polo que dende o Servizo Municipal de Control de Pragas continuamos coa revisión periódica das trampas. Nas que temos colocadas por toda a zona urbana foron capturadas 213 raíñas.
As persoas interesadas en sumarse aínda está a tempo de facelo. Simplemente hai que cubrir o formulario que figura ao pé desta nova e dende o Concello entregaranse, de balde, a trampa e o líquido atraente.
Un modelo para outros concellos
O Concello de Carballo foi pioneiro na organización de campañas de trampeo. A primeira levouse a cabo no ano 2017, e dende aquela cada ano se suman máis colaboradores e colaboradoras. Nos últimos anos, o sistema de participación veciñal implantado no noso concello é modelo a seguir por outros concellos galegos, aos que se suma agora tamén o de Sant Cugat del Vallès. A área de Sustentabilidade e Participación Cidadá do concello catalán vén de poñerse en contacto co noso concello coa intención de aplicar tamén o modelo de Carballo.