Inicio Carballo ao día Novas Corte de tráfico e anulación da...

RESTRINXIDO O TRÁNSITO DE VEHÍCULOS PESADOS POLA ZONA URBANA

Corte de tráfico e anulación da parada de autobús da rúa Perú ata o martes 6 de abril por mor das obras de reurbanización

Hoxe tamén comezou a construción da rotonda da avenida de Bergantiños, que estará parcialmente pechada esta semana

Luns 29 de marzo do 2021

A parada de autobuses non estará operativa ata o martes 6 de abril

A parada de autobuses non estará operativa ata o martes 6 de abril

A rúa Perú estará pechada ao tráfico dende o martes 30 de marzo ata o martes 6 de abril para facilitar o desenvolvemento das obras de pavimentación da calzada e a construción da rotonda que mellorará a fluidez do tráfico no cruce coas rúas Pontevedra e Ecuador. A empresa construtora, Vázquez y Reino, prevé desenvolver os traballos entre mañá e o mércores, pero será preciso evitar o tránsito de vehículos durante as xornadas seguintes para que poida fraguar o cemento. Tan só se permitirá o acceso a persoas residentes e/ou usuarias de garaxes, e os turismos procedentes da avenida Ponte da Pedra tamén poderán circular ata a rúa Ecuador, pola que serán desviados. Os accesos ás rúas Pontevedra e Ourense estarán pechados.

O corte da rúa afecta á circulación dos autobuses, o que obrigará a anular durante estes días a parada de autobús. As persoas usuarias do transporte público deberán dirixirse ou ben á estación de autobuses ou ben a calquera das paradas situadas na rúa Vázquez de Parga. O servizo restablecerase o martes 6.

Hoxe empezaron as obras da rotonda da avenida de Bergantiños

Hoxe empezaron as obras da rotonda da avenida de Bergantiños

Hoxe comezaron tamén as obras de construcción da rotonda que contribuirá á mellora da circulación nos cruces das rúas Vila de Corcubión, Alfredo Brañas e avenida de Bergantiños. Esta última está parcialmente pechada ao tráfico para facilitar o desenvolvemento dos traballos que executa a empresa Excavaciones Candal. A glorieta terá 19,5 metros de diámetro, e quedará lista o mércores.

O Concello de Carballo decidiu aproveitar as vacacións de Semana Santa para acometer estas actuacións, dado que non circula o transporte escolar e tamén se reduce o de mercadorías. Aínda así , durante toda esta semana está restrinxida a circulación de tráfico pesado pola zona urbana, e os camións son desviados pola circunvalación da AG-55.

Por outra banda, hoxe tamén comezou o pintado da travesía urbana da estrada de Ordes, que estaba pendente despois da mellora da pavimentación da vía por parte da Deputación da Coruña.

Compartir: