Inicio Carballo ao día Novas Carballo por Etapas repartiu 17.000 tapas durante...

Carballo por Etapas repartiu 17.000 tapas durante as dúas fins de semana de ruta gastronómica

Son 500 tapas máis que na anterior edición; ademais, o tren acolleu arredor de 2.200 viaxeiros e repartíronse aproximadamente 1.900 agasallos

Martes 4 de xuño do 2019

O tren tivo 2.200 viaxeiros/as

O tren contou con 2.200 viaxeiros/as

Arredor de 17.000 tapas -500 máis que o ano pasado- 2.200 viaxeiros e viaxeiras no tren e arredor de 1.900 agasallos. Son as cifras da sétima edición de Carballo por Etapas, a ruta gastronómica que visita a capital municipal cada ano a finais do mes de maio. A valoración da actividade é moi boa polo incremento global no número de tapas consumidas polos visitantes, nomeadamente tendo en conta que a segunda fin de semana un local causou baixa por motivos persoais plenamente xustificados. O cheo nos locais e nas terrazas deixouse ver durante a ruta gastronómica, especialmente o domingo que cadrou en feira, o 26 de maio, e durante toda a primeira fin de semana, aínda que a afluencia foi continuada na maioría dos locais durante todos os días de Carballo por Etapas.

Tamén hai que subliñar que numerosos bares e tascas esgotaron a primeira quenda de “rascas” dispoñibles para repartir entre a clientela e tiveron que pedir máis para poder repartir os agasallos entre os comensais. A pesar de que aumentou o consumo no número de tapas, é certo que diminuíron un pouco os viaxeiros do tren durante a segunda fin de semana en que o sol e as altas temperaturas fixeron que menos xente se animase a subir aos vagóns.

Variedade de tapas e de locais

Hai que resaltar así mesmo a variedade da oferta das tapas e das elaboracións para esta edición, con propostas como salpicón, arroz, bacallau, ragú, solombo, chipiróns, gambóns, polbo, xamón ibérico, lombo, lacón, zamburiñas e moitos produtos máis.

De todo, moi bo e moi saboroso púidose degustar nos dezasete locais que participaron este ano:  A Barra Bar, A Nova Ferradora, A Nova Tasca, Cafetería Habanos 79, Cervecería Ágora, Cervecería A Tapería, Korner Carballo, Mesón A Cabaña, Mesón As Viandas, Oasis Restaurante-Vinoteca, O’Burato 26 Marisquería, Restaurante A Esmorga, Restaurante Mesón do Pulpo, Restaurante Vinoteca A de Pako, Taberna O Mexillón, Trattoría Pizzeria Vesuvio e Vinoteca Ánfora. As dúas fins de semana transcorreron sen incidencias, excepto pola ausencia plenamente xustificada a segunda fin de semana de A Nova Ferradora.

Compartir: