Inicio Carballo ao día Novas O Concello de Carballo retirou o ano pasado 646...

O Concello de Carballo retirou o ano pasado 646 niños de avespa velutina, un menos que no 2017

A intensa campaña de trampeo, con máis de 10.000 raíñas capturadas, deu moi bos resultados no primeiro semestre

Mércores 9 de xaneiro do 2019

Eliminación de niño de velutina a gran altura en Guitoi-Sofán

Eliminación de niño de velutina a gran altura en Guitoi-Sofán

A loita contra a vespa velutina saldouse no ano 2018 cun total de 646 niños retirados, un menos que o ano anterior, segundo consta no balance presentado pola empresa contratada polo Concello de Carballo para a prestación do servizo de control de pragas.

Malia frear a preocupante progresión da presenza da avespa asiática que se viña rexistrando no noso concello, as cifras poñen de manifesto que a invasión continúa. O ano pasado realizouse unha intensa campaña de trampeo na que foron capturadas máis de 10.000 raíñas. Os bos resultados da iniciativa, xunto con outros factores, traducíronse nun descenso do número de niños no primeiro semestre do ano, pero a partir do verán volveuse a disparar a incidencia da praga.

Niño viaxeiro

O niño viaxeiro, no IES Alfredo Brañas

O niño viaxeiro, no IES Alfredo Brañas

O Concello de Carballo, a través da empresa Plaguiber e coa colaboración de apicultores locais, continuará este ano coas medidas encamiñadas a intentar frear os danos provocados polo avespa asiática, tanto intensificando o trampeo durante a primavera coma fomentando as campañas divulgativas entre distintos sectores da poboación. Entre elas figura a exposición do niño viaxeiro, que pode verse estes días no primeiro andar da Casa do Concello, pero que está a disposición de centros escolares e entidades interesadas. Só teñen que poñerse en contacto co servizo municipal de Medio Ambiente no teléfono 981 704 100.

O Concello de Carballo foi pioneiro en Galicia en combater a praga con medios propios, xa que, malia tratarse dunha que corresponde á Administración Autonómica, consideramos que a seguridade da poboación debe ser prioritaria. Deste xeito, dende o ano 2017 a loita contra a vespa velutina está incluída no contrato do servizo de control de pragas e os avisos que se reciben son atendidos en 24 horas na práctica totalidade dos casos.

Ningunha das 18 parroquias do noso concello se libra da praga. No mes de decembro, no que foron retirados 80 niños, a peor parte correspondeu a Rus, con 21, e Razo, con 18. A práctica totalidade apareceron en árbores, boa parte deles a moita altura, o que obrigou a utilizar a grúa en varias ocasións.

As persoas que localicen un niño poden chamar ao 012 ou ao 112, desde onde darán aviso ao Servizo Municipal de Control de Pragas.

Compartir: