Instalado no edificio de Servizos Sociais un punto de información do Servizo Público de Emprego de Galicia

A renovación da demanda de emprego mediante pegada dactilar ou o acceso ás ofertas de traballo son algunhas das operacións dispoñibles

Martes 10 de outubro do 2017

A oficina de emprego situada na planta baixa do Fórum xa non é o único lugar de Carballo onde se pode renovar a demanda de emprego. Esta semana quedou instalado no edificio de Servizos Múltiples, na avenida do Ambulatorio, un Punto SPEG. Trátase dun posto de autoservizo que achega e facilita a comunicación entre o cidadán e o Servizo Público de Emprego de Galicia, ao tempo que permite realizar certas xestións sen necesidade de acudir a unha oficina de emprego.  

O punto de información está dispoñible na entrada do edificio

Deste xeito, o Punto SPEG permite renovar a demanda de emprego mediante pegada dactilar, acceder ás ofertas de traballo ou ás páxinas web dos diferentes servizos públicos de emprego autonómicos e estatal. Sen embargo, para poder renovar a demanda debe acudirse previamente á oficina de emprego para rexistrar a pegada dactilar e así darse de alta no sistema, pero a partir dese rexistro xa se poderá operar desde calquera punto de información da comunidade autónoma.

A concelleira de Igualdade e Benestar, Maica Ures, valorou de xeito positivo a instalación do punto de información, xa que achega o servizo á cidadanía e convértese nun recurso máis para as persoas usuarias do departamento de Servizos Sociais.